Cənubi Koreya və Türkiyə AES və müdafiə sənayesi sahəsində əməkdaşlığı genişləndirir

Cənubi Koreya və Türkiyə atom elektrik stansiyalarının tikintisi, müdafiə istehsalı və infrastruktur sahələrində strateji əməkdaşlığı dərinləşdirmək barədə razılığa gəliblər. Tərəflər Sinopda AES layihəsi üzrə əməkdaşlıqda əldə olunan irəliləyişi də müzakirə ediblər.

PostNews xəbər verir ki, bu barədə Cənubi Koreya Prezidenti Li Çje Myon Seulda Türkiyə Prezidenti Rəcəb Tayyib Ərdoğanla keçirilən birgə mətbuat konfransında bildirib.

Li Çje Myonun sözlərinə görə, tərəflər ikitərəfli münasibətləri dərin dostluq və etimad əsasında inkişaf etdirmək, strateji istiqamətlərdə birgə fəaliyyəti genişləndirmək niyyətindədirlər.

“Bu gün Prezident Ərdoğanla dərin dostluq və etimada əsaslanan ikitərəfli əməkdaşlığın perspektivlərini genişləndirmək barədə razılığa gəldik. İki ölkə AES, müdafiə istehsalı və infrastruktur da daxil olmaqla strateji sahələrdə daha mühüm əməkdaşlığa can atacaq”, – Cənubi Koreya prezidenti qeyd edib.

Sinop AES layihəsində əməkdaşlıq

Dövlət başçısı Türkiyənin Sinop şəhərində atom elektrik stansiyasının tikintisi layihəsi üzrə tərəflər arasında əməkdaşlıqda irəliləyiş olduğunu da vurğulayıb. Cənubi Koreyanın da iştirak etməyi planlaşdırdığı layihə iki ölkənin enerji sahəsində tərəfdaşlığının əsas istiqamətlərindən biri kimi nəzərdən keçirilir.

Xatırladaq ki, Cənubi Koreyanın dövlət şirkəti “Korea Electric Power Corp.” (KEPCO) və Türkiyənin “Turkiye Nuclear Energy Company” şirkəti 2025-ci ildə Li Çje Myon və Rəcəb Tayyib Ərdoğanın sammiti çərçivəsində layihə üzrə əməkdaşlığa dair qarşılıqlı anlaşma memorandumu imzalayıblar.

Bundan sonra tərəflər layihənin ilkin texniki-iqtisadi əsaslandırılması işlərinə başlayıblar.

Ərdoğanın Cənubi Koreyaya səfəri

Türkiyə Prezidenti Rəcəb Tayyib Ərdoğan bazar ertəsi üçgünlük dövlət səfəri çərçivəsində Cənubi Koreyaya yola düşüb. Bu, onun 2018-ci ildən bəri həmin ölkəyə ilk səfəridir.

Məlumatı “Yonhap” agentliyi yayıb.