Qətər korrupsiya aktivlərinin geri qaytarılması üçün əməkdaşlığa çağırıb

Korrupsiya cinayətlərinin araşdırılması, qanunsuz əldə edilmiş aktivlərin geri qaytarılması və dövlətlər arasında məlumat mübadiləsinin genişləndirilməsi beynəlxalq əməkdaşlığın əsas istiqamətlərindən biri olmalıdır. Bu baxımdan, İslam Əməkdaşlıq Təşkilatına (İƏT) üzv ölkələrin müvafiq hüquq-mühafizə orqanları arasında qarşılıqlı fəaliyyətin gücləndirilməsi və Məkkə Konvensiyasının qüvvəyə minməsi xüsusi əhəmiyyət daşıyır.

PostNews xəbər verir ki, bunu Qətərin İnzibati Nəzarət və Şəffaflıq Orqanının prezidenti Həməd bin Nasser Əl-Misnəd Bakıda keçirilən İƏT-ə üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü yüksək səviyyəli görüşündə bildirib.

Onun sözlərinə görə, Məkkə Konvensiyası üzv dövlətlərin səlahiyyətli qurumları arasında əməkdaşlığın genişləndirilməsi, korrupsiya cinayətlərinin təqibi və qanunsuz əldə edilmiş aktivlərin geri qaytarılması üçün mühüm hüquqi mexanizmdir.

Məkkə Konvensiyasını imzalayan ölkələrin sayı 24-ə çatıb

Həməd bin Nasser Əl-Misnəd bildirib ki, Qətər 2024-cü ilin noyabrında Dohada keçirilən ikinci yüksək səviyyəli görüşə ev sahibliyi edib və tədbirə sədrlik edib.

Onun sözlərinə görə, Doha görüşü İƏT ölkələrinin korrupsiyaya qarşı mübarizə aparan qurumları arasında əlaqələrin gücləndirilməsinə və Məkkə Konvensiyasına qoşulma prosesinin genişlənməsinə töhfə verib.

“Doha görüşündə 21 dövlət konvensiyanı imzalayıb və bununla da həmin vaxt sənədi imzalayan ölkələrin ümumi sayı 24-ə çatıb. Bu öhdəliyin davamı olaraq Qətər bu yaxınlarda konvensiyanı ratifikasiya edib”, – deyə Qətər rəsmisi bildirib.

O qeyd edib ki, sənədin mümkün qədər tez qüvvəyə minməsi üçün üzv dövlətlərin imzalama və ratifikasiya prosedurlarını tamamlaması gözlənilir.

Korrupsiya cinayətlərinin təqibi və aktivlərin qaytarılması prioritetdir

Qətərin İnzibati Nəzarət və Şəffaflıq Orqanının prezidenti bildirib ki, Məkkə Konvensiyası dövlətlərin səlahiyyətli qurumları arasında hüquqi əməkdaşlığın inkişafına xidmət edir.

Onun sözlərinə görə, sənəd müvafiq hüquqi çərçivələrə uyğun olaraq məlumat mübadiləsinin genişləndirilməsi, transsərhəd korrupsiya cinayətlərinin təqibi və cinayət yolu ilə əldə olunmuş aktivlərin geri qaytarılması baxımından əhəmiyyətlidir.

Həməd bin Nasser Əl-Misnəd qeyd edib ki, mövcud siyasi və təhlükəsizlik şəraiti milli resursların qorunmasını və korrupsiyaya qarşı birgə mübarizənin gücləndirilməsini daha da aktuallaşdırır.

O bildirib ki, dünyada müşahidə olunan mürəkkəb proseslər dövlətlərin resurslarına, institutlarının fəaliyyətinə və inkişaf perspektivlərinə təsir göstərir.

Qətər 2025–2030-cu illər üzrə korrupsiyaya qarşı milli strategiyasını həyata keçirir

Həməd bin Nasser Əl-Misnəd ölkəsinin korrupsiyanın qarşısının alınması və şəffaflığın artırılması istiqamətində gördüyü tədbirlər barədə də məlumat verib.

O bildirib ki, Qətər 2025–2030-cu illəri əhatə edən dürüstlüyün və şəffaflığın gücləndirilməsi, korrupsiyanın qarşısının alınması üzrə milli strategiyanın icrasına başlayıb.

Qətər rəsmisi ölkəsinin beynəlxalq antikorrupsiya təşəbbüslərində də iştirak etdiyini diqqətə çatdırıb.

Onun sözlərinə görə, Qətər 2025-ci ilin dekabrında BMT-nin Korrupsiyaya qarşı Konvensiyasına üzv dövlətlərin Konfransının 11-ci sessiyasına, 2026-cı ilin sentyabrında isə Korrupsiyaya qarşı Ərəb Konvensiyasına üzv dövlətlərin Konfransının altıncı sessiyasına ev sahibliyi edib.

Qətər dövlətlərin suverenliyinə və qanunun aliliyinə hörmət edilməsini vacib sayır

Həməd bin Nasser Əl-Misnəd çıxışında beynəlxalq hüquq prinsiplərinin qorunmasının əhəmiyyətini də vurğulayıb.

“Qətər dövlətlərin suverenliyinə hörmət edilməsinin, mübahisələrin sülh yolu ilə həllinin, qanunun aliliyinin möhkəmləndirilməsinin və cəzasızlığa qarşı mübarizənin zəruriliyini vurğulayır”, – deyə o bildirib.

Qətər rəsmisinin sözlərinə görə, dövlətlər arasında əməkdaşlığın gücləndirilməsi milli resursların qorunması və korrupsiyaya qarşı mübarizənin səmərəliliyinin artırılması baxımından mühüm rol oynayır.

Korrupsiyaya qarşı mübarizə görüşünə sədrlik Azərbaycana keçib

Həməd bin Nasser Əl-Misnəd Bakıda keçirilən üçüncü yüksək səviyyəli görüşə ev sahibliyi etdiyinə və tədbirin təşkilinə görə Azərbaycana təşəkkürünü bildirib.

O, həmçinin üzv dövlətlər arasında əməkdaşlığın əlaqələndirilməsi istiqamətində fəaliyyətinə görə İƏT-in Baş Katibliyinə minnətdarlığını ifadə edib.

Qətər rəsmisi ölkəsinin sədrlik müddətinin başa çatdığını və növbəti mərhələdə bu prosesə Azərbaycanın rəhbərlik edəcəyini qeyd edib.

“Qətərin sədrlik müddətini başa vurarkən üzv dövlətlərə və Baş Katibliyə əməkdaşlığa görə təşəkkür edirik. Əminik ki, qardaş Azərbaycan Respublikası ölkələrimizə və xalqlarımıza xidmət edən praktiki nəticələrin əldə olunması istiqamətində bu prosesə rəhbərliyi uğurla davam etdirəcək”, – deyə Həməd bin Nasser Əl-Misnəd vurğulayıb.