Qarabağ və Şərqi Zəngəzurda həyata keçirilən layihələr sahibkarlar üçün geniş imkanlar açır – Pərvin Bağırova

Qarabağ və Şərqi Zəngəzurda həyata keçirilən genişmiqyaslı bərpa və yenidənqurma layihələri regionun iqtisadi potensialının gücləndirilməsi, yeni investisiyaların cəlb olunması və dövlət-özəl tərəfdaşlığının inkişafı üçün əlverişli imkanlar formalaşdırır. Bu prosesdə beynəlxalq biznes platformalarının imkanlarından istifadə edilməsi, xarici investorlarla əlaqələrin genişləndirilməsi və regionun dayanıqlı inkişafına yönəlmiş təşəbbüslərin təşviqi xüsusi əhəmiyyət daşıyır.

PostNews xəbər verir ki, bunu Qarabağ Dirçəliş Fondunun Fandreyzinq və kommunikasiya şöbəsinin müdiri Pərvin Bağırova noyabrın 4–6-da Bakı Ekspo Mərkəzində keçiriləcək Azərbaycan Beynəlxalq Daşınmaz Əmlak və İnvestisiya Sərgisinə (AIREX 2026) həsr olunmuş mətbuat konfransında bildirib.

Onun sözlərinə görə, Qarabağ Dirçəliş Fondunun fəaliyyətinin əsas istiqamətlərindən biri işğaldan azad edilmiş ərazilərin bərpasına və yenidən qurulmasına maliyyə dəstəyinin göstərilməsi, sərmayələrin cəlb olunması və regionun dayanıqlı iqtisadiyyata, yüksək rifaha malik əraziyə çevrilməsinə töhfə verilməsidir.

Qarabağın bərpasında dövlət-özəl tərəfdaşlığı mühüm rol oynayır

Pərvin Bağırova bildirib ki, Fond işğaldan azad edilmiş ərazilərdə həyata keçirilən bərpa və quruculuq tədbirlərinin maliyyələşdirilməsinə dəstək göstərməklə yanaşı, bu prosesə özəl sektorun cəlb olunması istiqamətində də fəaliyyət göstərir.

Onun sözlərinə görə, sərmayələrin cəlb edilməsi və dövlət-özəl tərəfdaşlığının inkişaf etdirilməsi Qarabağ Dirçəliş Fondunun qarşıya qoyduğu əsas vəzifələr sırasındadır.

Fondun fəaliyyətində mühüm istiqamətlərdən biri də Qarabağda görülən işlər barədə ölkə daxilində və beynəlxalq səviyyədə məlumatlandırmanın aparılması, maarifləndirmə və təşviqat tədbirlərinin həyata keçirilməsidir.

Şöbə müdiri qeyd edib ki, bu fəaliyyət bərpa və yenidənqurma prosesinin daha geniş ictimaiyyətə çatdırılması, həyata keçirilən layihələrə marağın artırılması və müxtəlif tərəfdaşların regionun inkişafına töhfə verməsi baxımından əhəmiyyətlidir.

Qarabağda bərpa prosesi yalnız infrastruktur layihələri ilə məhdudlaşmır

P.Bağırova vurğulayıb ki, işğaldan azad edilmiş ərazilərdə həyata keçirilən genişmiqyaslı yenidənqurma prosesi yalnız fiziki infrastrukturun bərpasını əhatə etmir.

Onun sözlərinə görə, bu proses eyni zamanda Qarabağın mədəni, ictimai və sosial həyatının yenidən formalaşdırılmasına istiqamətlənib.

“Bu gün Qarabağda həyat yenidən canlanır, şəhər və kəndlərimiz yenidən qurulur, elm, təhsil, mədəniyyət və sosial sahələrdə böyük layihələr həyata keçirilir. Qarabağ Dirçəliş Fondu olaraq işğaldan azad edilmiş ərazilərin dirçəlişi prosesində yaxından iştirak etməkdən qürur duyuruq və bundan sonra da bu işə öz töhfəmizi verməyə davam edəcəyik”, – deyə Pərvin Bağırova bildirib.

Şöbə müdiri qeyd edib ki, Qarabağın dirçəlişi kompleks yanaşma tələb edən prosesdir. Bu baxımdan regionda həyata keçirilən layihələrin iqtisadi inkişafla yanaşı, sosial rifahın yüksəldilməsinə və ictimai həyatın bərpasına xidmət etməsi mühüm əhəmiyyət daşıyır.

Qarabağ və Şərqi Zəngəzurda biznes üçün yeni imkanlar yaranır

Pərvin Bağırova bildirib ki, hazırda Qarabağ və Şərqi Zəngəzurda həyata keçirilən irimiqyaslı layihələr, eləcə də formalaşdırılan əlverişli biznes mühiti sahibkarlar üçün geniş imkanlar açır.

Onun sözlərinə görə, regionda aparılan bərpa və yenidənqurma işləri yerli və xarici biznes nümayəndələrinin diqqətini cəlb edə biləcək mühüm inkişaf istiqamətlərini əhatə edir.

Bu baxımdan Qarabağda görülən işlərin beynəlxalq platformalarda təqdim olunması potensial tərəfdaşlarla əlaqələrin qurulması və gələcək əməkdaşlıq imkanlarının müzakirəsi üçün əhəmiyyətli hesab edilir.

Şöbə müdiri vurğulayıb ki, beynəlxalq tədbirlər vasitəsilə regionun inkişaf perspektivlərinin daha geniş auditoriyaya çatdırılması Qarabağ və Şərqi Zəngəzurda həyata keçirilən layihələrə marağın artırılmasına xidmət edə bilər.

AIREX 2026 Qarabağın investisiya potensialının tanıdılmasına töhfə verəcək

Qarabağ Dirçəliş Fondunun nümayəndəsi AIREX 2026 sərgisinin müxtəlif ölkələrdən investorları, sahibkarları və sahə mütəxəssislərini bir araya gətirməsini əhəmiyyətli amil kimi qiymətləndirib.

Onun sözlərinə görə, belə beynəlxalq platformalar Qarabağda həyata keçirilən bərpa və quruculuq işlərinin təqdim edilməsi, regionun inkişaf imkanlarının tanıdılması və mümkün tərəfdaşlıqların müzakirəsi baxımından xüsusi əhəmiyyət daşıyır.

“AIREX-in müxtəlif ölkələrdən biznes nümayəndələrini, investorları, mütəxəssisləri bir araya gətirdiyini nəzərə alaraq, bu platforma bizim üçün olduqca maraqlıdır. Məhz belə tədbirlər Qarabağda həyata keçirilən bərpa və quruculuq işlərinin daha geniş auditoriyaya çatdırılması, bu prosesə marağın artırılması, mümkün əməkdaşlıqların müzakirəsi baxımından əhəmiyyətli rol oynayır”, – deyə P.Bağırova bildirib.

O qeyd edib ki, sərgi Qarabağ və Şərqi Zəngəzurda görülən işlərin beynəlxalq auditoriyaya təqdim olunması ilə yanaşı, regionun gələcək inkişafına xidmət edə biləcək yeni təşəbbüslərin müzakirəsinə də şərait yaradacaq.

Sosial, mədəni və ekoloji layihələr üzrə əməkdaşlıq imkanları müzakirə ediləcək

Pərvin Bağırova AIREX 2026-nın yalnız daşınmaz əmlak və investisiya sahəsində deyil, sosial, mədəni və ekoloji istiqamətlərdə də yeni əməkdaşlıq təşəbbüslərinin irəli sürülməsi üçün əlverişli imkan yaratdığını bildirib.

Onun sözlərinə görə, Qarabağın dayanıqlı inkişafı baxımından müxtəlif sahələr üzrə tərəfdaşlıqların qurulması, təcrübə mübadiləsinin aparılması və yeni ideyaların müzakirəsi xüsusi əhəmiyyət daşıyır.

Şöbə müdiri hesab edir ki, sərgi regionda həyata keçirilən layihələr barədə məlumatların paylaşılması ilə yanaşı, Qarabağın sosial və mədəni həyatının inkişafına, ətraf mühitin qorunmasına və uzunmüddətli inkişaf məqsədlərinə xidmət edən təşəbbüslərin müzakirəsi üçün də məhsuldar platforma ola bilər.

P.Bağırova AIREX 2026 çərçivəsində aparılacaq fikir mübadiləsinin gələcək tərəfdaşlıqların formalaşmasına töhfə verəcəyinə ümidvar olduğunu ifadə edib.

Şəhərsalma və dayanıqlı inkişaf məsələləri xüsusi əhəmiyyət daşıyır

Fondun nümayəndəsi bildirib ki, şəhərsalma və dayanıqlı inkişaf kimi qlobal prioritetlərin AIREX 2026-nın proqramına daxil edilməsi sərginin strateji əhəmiyyətini artırır.

Onun sözlərinə görə, bu istiqamətlərin beynəlxalq səviyyədə müzakirəsi şəhər və yaşayış məkanlarının inkişafına dair yanaşmaların öyrənilməsi, müasir təcrübələrin paylaşılması və gələcək əməkdaşlıq perspektivlərinin qiymətləndirilməsi üçün imkanlar yaradır.

P.Bağırova sərginin gələcək illərdə də səmərəli əməkdaşlıq platforması kimi fəaliyyət göstərəcəyinə ümid etdiyini bildirib.

O qeyd edib ki, Qarabağda hazırda həyata keçirilən bərpa və quruculuq layihələri gələcəkdə regionun inkişafının və əldə olunan nəticələrin daha geniş auditoriyaya təqdim olunmasına imkan yaradacaq.

AIREX 2026 noyabrın 4–6-da keçiriləcək

Qeyd edək ki, noyabrın 4–6-da Bakı Ekspo Mərkəzində keçiriləcək AIREX 2026 beynəlxalq daşınmaz əmlak və investisiya sərgisində 20-dən çox ölkədən nümayəndələrin, 70-dən artıq yerli və beynəlxalq şirkətin iştirakı gözlənilir.

Üç gün davam edəcək tədbirə ümumilikdə 20 min ziyarətçinin qatılacağı proqnozlaşdırılır.

Sərgi çərçivəsində beş panel müzakirəsi, şirkət təqdimatları, investorlarla işgüzar görüşlər və beynəlxalq əməkdaşlıq imkanlarına dair müzakirələr nəzərdə tutulur.

Tədbir “Baku Expo Management” və “PAŞA Property Management”in təşkilatçılığı, Qarabağ Dirçəliş Fondu və digər müvafiq qurumların dəstəyi ilə keçiriləcək.

Sərgiyə giriş ödənişsizdir. Ətraflı məlumat və qeydiyyat üçün AIREX 2026-nın rəsmi saytına müraciət etmək mümkündür.

Qeyd edək ki, AIREX 2026 beynəlxalq daşınmaz əmlak və investisiya sərgisinin informasiya dəstəkçilərindən biri də PostNews xəbər portalıdır.