Azərbaycan və Özbəkistanın turizm potensialı Avropanın 4 şəhərində təqdim olunub

Azərbaycan və Özbəkistanın turizm imkanları Almaniya, İsveç və Finlandiyanın dörd şəhərində keçirilən beynəlxalq tanıtım tədbirlərində təqdim edilib. Tədbirlər çərçivəsində Avropanın turizm sənayesi nümayəndələri ilə B2B formatında işgüzar görüşlər təşkil olunub, birgə səyahət marşrutları və əməkdaşlıq perspektivləri müzakirə edilib.

PostNews xəbər verir ki, oktyabrın 19–22-də Azərbaycan Turizm Bürosu (ATB) və Özbəkistanın Milli PR Mərkəzinin birgə təşkilatçılığı ilə “İpək Yolunun inciləri 2026” (“Highlights of the Silk Road Roadshow 2026”) adlı tanıtım tədbirləri keçirilib.

Tədbirlər Almaniyanın Berlin və Münhen, İsveçin Stokholm və Finlandiyanın Helsinki şəhərlərini əhatə edib.

Avropanın dörd şəhərində turizm şirkətləri ilə B2B görüşlər keçirilib

Tanıtım proqramı çərçivəsində hər şəhərdə 50 turizm sənayesi nümayəndəsinin iştirakı ilə B2B formatında işgüzar görüşlər təşkil olunub.

Görüşlərdə Azərbaycan və Özbəkistanın turizm məhsulları, tarixi-mədəni irsi, səyahət imkanları və birgə turizm marşrutları təqdim edilib.

Avropanın turizm şirkətləri ilə əməkdaşlığın genişləndirilməsi, yeni bazar imkanlarının qiymətləndirilməsi və qarşılıqlı işgüzar əlaqələrin qurulması məsələləri müzakirə olunub.

Proqram çərçivəsində hər iki ölkənin milli musiqi və rəqs nümunələrini əhatə edən mədəni tədbirlər də təşkil edilib.

Azərbaycanı 6 turizm şirkəti təmsil edib

Tədbirlərdə Azərbaycan və Özbəkistandan ümumilikdə 15-ə yaxın turizm sənayesi tərəfdaşı iştirak edib.

Onlardan 6-sı Azərbaycanı təmsil edən turizm şirkətləri (DMC) olub.

İştirakçılar Avropa bazarında fəaliyyət göstərən turizm şirkətləri ilə görüşərək mövcud turizm məhsullarını və potensial əməkdaşlıq istiqamətlərini təqdim ediblər.

AZAL və digər aviaşirkətlər turizm marşrutlarının inkişafını müzakirə edib

Tanıtım tədbirlərinə beynəlxalq aviaşirkətlər də qatılıb.

“Azərbaycan Hava Yolları” QSC (AZAL) Berlin şəhərində keçirilən tədbirdə iştirak edib.

“Türk Hava Yolları” Berlin və Münhendə, “Uzbekistan Airways” və “Centrum Air” isə dörd şəhərin hər birində təmsil olunublar.

Aviaşirkətlərin iştirakı Azərbaycan və Özbəkistan üzrə səyahət marşrutlarının planlaşdırılması, hava əlaqələri və turizm şirkətləri arasında məlumat mübadiləsinin aparılması baxımından əhəmiyyət daşıyıb.

Azərbaycan və Özbəkistan vahid turizm brendi altında təşviq olunur

“İpək Yolunun inciləri 2026” tədbirləri Azərbaycan Turizm Bürosu ilə Özbəkistanın Milli PR Mərkəzi arasında imzalanmış Anlaşma Memorandumu çərçivəsində həyata keçirilib.

Əməkdaşlıq iki ölkənin vahid turizm brendi altında beynəlxalq bazarlarda tanıdılmasını və tarixi İpək Yolu boyunca bir-birini tamamlayan səyahət istiqamətləri kimi təqdim olunmasını nəzərdə tutur.

Bu istiqamətdə tarixi abidələr, ənənəvi sənətkarlıq, incəsənət və qeyri-maddi mədəni irs nümunələrini əhatə edən turizm marşrutlarının inkişafına xüsusi diqqət yetirilir.

Dörd Avropa şəhərində keçirilən tədbirlər Azərbaycan və Özbəkistanın beynəlxalq turizm bazarlarında tanıdılması, yeni biznes tərəfdaşlıqlarının qurulması və birgə turizm məhsullarının təşviqi məqsədi daşıyıb.

 

1 of 14

- +

1.

2.

3.

4.

5.

6.

7.

8.

9.

10.

11.

12.

13.

14.