Yaponiyanın Tokio və Osaka şəhərlərində Azərbaycanla bağlı biznes tədbirləri keçiriləcək – AÇIQLAMA

2027-ci ildə Yaponiyanın Tokio və Osaka şəhərlərində Azərbaycan və Yaponiya iş adamlarının iştirakı ilə genişmiqyaslı biznes görüşlərinin keçirilməsi planlaşdırılır. Məqsəd iki ölkə arasında iqtisadi və ticarət əlaqələrini inkişaf etdirmək, Azərbaycan şirkətlərinin Yaponiya bazarına çıxış imkanlarını genişləndirmək və yeni investisiya tərəfdaşlıqlarının qurulmasına şərait yaratmaqdır.

Bu barədə Yaponiyanın “Universal Alliance” şirkətinin təmsilçisi, Yaponiya-Azərbaycan Tərəfdaşlıq Assosiasiyasının (JAZPA) nümayəndəsi və “THE JAPAN ESSENCE GLOBAL EXPO 2026” sərgisinin təşkilatçılarından biri Hitoşi Usukura PostNews-a açıqlamasında bildirib.

Oktyabrın 18–19-da Bakıda keçirilən beynəlxalq biznes sərgisində iştirak edən Hitoşi Usukura Yaponiya şirkətlərinin Azərbaycan bazarına marağından, iki ölkə arasında ticarət əlaqələrinin inkişafından və gələcək əməkdaşlıq planlarından danışıb.

Onun sözlərinə görə, əsas hədəflərdən biri Yaponiya şirkətlərinin Azərbaycanda fəaliyyət imkanlarını araşdırmasına və yerli sahibkarlarla birbaşa əlaqələr qurmasına dəstək göstərməkdir.

“Əsas məqsədimiz Yaponiya ilə Azərbaycan arasında iqtisadi əlaqələri daha da gücləndirməkdir. İstəyirik ki, daha çox Yaponiya şirkəti Azərbaycana gəlsin, buradakı biznes imkanları ilə tanış olsun və yerli sahibkarlarla uzunmüddətli əməkdaşlıq qursun. Bakıda təşkil etdiyimiz sərgi də bu istiqamətdə atdığımız addımlardan biridir”, – deyə H.Usukura bildirib.

Tokiodan sonra Osakada da Azərbaycanla bağlı biznes görüşləri təşkil olunacaq

Hitoşi Usukura bildirib ki, iki ölkə arasında iqtisadi əməkdaşlığın genişləndirilməsi məqsədilə Yaponiyada da müxtəlif işgüzar tədbirlər keçirilir.

Onun sözlərinə görə, 2026-cı ildə Tokioda Azərbaycan nümayəndələrinin dəvət olunduğu xüsusi qəbul təşkil edilib. Növbəti ildə isə tədbirlərin coğrafiyasının və iştirakçı sayının genişləndirilməsi nəzərdə tutulur.

“Bu il Tokioda Azərbaycandan dəvət etdiyimiz qonaqların iştirakı ilə xüsusi tədbir keçirdik. Təxminən 100 nəfər iştirak edirdi. Gələn il isə daha genişmiqyaslı görüşlər təşkil etməyi planlaşdırırıq. Tədbirlər həm Tokioda, həm də Osakada keçiriləcək. Məqsədimiz iki ölkənin iş adamları arasında daha çox birbaşa əlaqə yaratmaqdır”, – deyə o qeyd edib.

JAZPA nümayəndəsi əlavə edib ki, gələcəkdə Yaponiyada Azərbaycan şirkətlərinin məhsul və xidmətlərini təqdim edə biləcəyi sərgilərin təşkili də mümkün əməkdaşlıq istiqamətlərindən biri kimi nəzərdən keçirilir.

Bu təşəbbüs Azərbaycan sahibkarlarının Yaponiya bazarı ilə yaxından tanış olması, potensial tərəfdaşlar tapması və ixrac imkanlarını araşdırması baxımından yeni platforma yarada bilər.

Yaponiya şirkətləri Azərbaycan bazarına qida məhsulları çıxarmaq istəyirlər

Hitoşi Usukura Yaponiyanın qida sənayesində fəaliyyət göstərən şirkətlərinin Azərbaycan bazarına marağından da danışıb.

O bildirib ki, təmsil etdiyi “Universal Alliance” şirkəti müxtəlif Yaponiya istehsalçıları ilə əməkdaşlıq edir, onların məhsullarının xarici bazarlarda tanıdılmasına və potensial tərəfdaşlarla əlaqələrin qurulmasına dəstək göstərir.

“Biz müxtəlif Yaponiya şirkətlərini bir araya gətirir, onların məhsullarını təqdim edir və beynəlxalq ticarət əlaqələrinin inkişafına çalışırıq. Azərbaycan şirkətlərini Yaponiya istehsalçıları ilə birbaşa əlaqələndirmək imkanlarımız var. Məqsədimiz yeni əməkdaşlıqların yaranmasına və qarşılıqlı ticarətin genişlənməsinə kömək etməkdir”, – deyə şirkət nümayəndəsi vurğulayıb.

Onun sözlərinə görə, qida sənayesi Yaponiya ilə Azərbaycan arasında əməkdaşlıq imkanlarının mövcud olduğu istiqamətlərdən biridir.

Bakıda keçirilən sərgidə Yaponiyanın “Maruka Foods” şirkətinin hazır əriştə məhsulları, o cümlədən yakisoba çeşidləri də təqdim olunub.

Sərgi çərçivəsində Yaponiya qida məhsullarının Azərbaycan bazarında satış imkanları, yerli distribyutorlarla əməkdaşlıq, topdansatış və pərakəndə ticarət əlaqələrinin qurulması məsələləri diqqət mərkəzində olub.

“Məqsədimiz uzunmüddətli biznes tərəfdaşlıqları yaratmaqdır”

JAZPA nümayəndəsi bildirib ki, Azərbaycan və Yaponiya arasında əməkdaşlıq yalnız məhsul ixracı və idxalı ilə məhdudlaşmamalıdır.

Onun sözlərinə görə, iki ölkənin sahibkarları arasında davamlı əlaqələrin qurulması, yeni layihələrin hazırlanması və qarşılıqlı investisiya imkanlarının araşdırılması əsas prioritetlər sırasındadır.

Hitoşi Usukura vurğulayıb ki, təşkil olunan biznes görüşlərinin əsas məqsədi şirkətləri bir araya gətirməklə yanaşı, onların gələcək əməkdaşlığı üçün əlverişli imkanlar yaratmaqdır.

Yaponiya-Azərbaycan Tərəfdaşlıq Assosiasiyasının fəaliyyəti iqtisadiyyat və ticarətlə yanaşı, təhsil, turizm, mədəniyyət və digər istiqamətlərdə əlaqələrin inkişafına dəstək göstərməyi də əhatə edir.

Assosiasiya potensial tərəfdaşların müəyyənləşdirilməsi, biznes görüşlərinin təşkili və şirkətlərin qarşılıqlı bazarlara çıxış imkanlarının araşdırılması istiqamətində təşəbbüslərlə çıxış edir.

Bakıda 50-dən çox Yaponiya şirkətinin iştirakı planlaşdırılmışdı

Qeyd edək ki, 18–19 oktyabr 2026-cı il tarixlərində “Baku Marriott Hotel Boulevard”da “THE JAPAN ESSENCE GLOBAL EXPO 2026” beynəlxalq biznes sərgisi və forumu keçirilib.

Tədbirin əsas məqsədi Azərbaycan və Yaponiya arasında iqtisadi əməkdaşlığı gücləndirmək, yeni investisiya imkanlarını təqdim etmək və iki ölkənin sahibkarları arasında işgüzar əlaqələri inkişaf etdirmək olub.

Təşkilatçıların əvvəlcədən açıqladığı məlumata görə, sərgidə 50-dən çox Yaponiya şirkətinin iştirakı nəzərdə tutulub.

Tədbir çərçivəsində qida sənayesi, istehsalat, texnologiya, səhiyyə, kosmetologiya, investisiya və digər sahələrdə fəaliyyət göstərən şirkətlərin məhsul və xidmətləri təqdim edilib.