Azərbaycan sahibkarlarının ABŞ bazarına çıxışı üçün yeni imkanlar yarana bilər – Rüstəm Qasımov

Azərbaycan, Türkiyə və ABŞ iş adamlarını bir araya gətirən beynəlxalq biznes platforması yerli sahibkarların Amerika bazarına çıxış imkanlarını genişləndirə bilər. Platforma çərçivəsində 2027-ci ildə konkret əməkdaşlıq layihələrinin həyata keçirilməsi gözlənilir.

Bu barədə ABA Travel şirkətinin direktoru Rüstəm Qasımov PostNews-a açıqlamasında bildirib.

O, oktyabrın 22-də Bakıda təşkil olunan “TABA-AmCham Eurasia Investment & Networking Summit 2026” beynəlxalq sammitinin əhəmiyyətindən, Azərbaycan sahibkarları üçün yarana biləcək yeni imkanlardan və turizm sektorunda xarici tərəfdaşlarla əməkdaşlığın inkişaf perspektivlərindən danışıb.

Rüstəm Qasımov: 2027-ci ildə konkret layihələrin həyata keçirilməsini gözləyirik

ABA Travel şirkətinin direktoru sammiti yüksək qiymətləndirərək bildirib ki, bu cür beynəlxalq tədbirlərin əsas üstünlüklərindən biri müxtəlif ölkələrin sahibkarları arasında yeni biznes əlaqələrinin qurulmasıdır.

“Bu tədbiri çox yüksək qiymətləndirirəm. Burada sahibkarlar üçün əlavə biznes platforması formalaşıb. Əsas gözləntim odur ki, 2027-ci ildə həmin platforma çərçivəsində konkret layihələr həyata keçirilsin və biz əməkdaşlığın real nəticələrini görə bilək. Azərbaycan və Türkiyə arasında biznes əlaqələri mövcuddur. İndi isə bu əməkdaşlıq imkanlarına ABŞ bazarı da əlavə olunur. Bu platforma Azərbaycan sahibkarlarının Amerika bazarına çıxışı üçün əlavə imkan yarada bilər”, – deyə R.Qasımov bildirib.

Onun sözlərinə görə, Azərbaycan sahibkarlarının beynəlxalq bazarlarda təmsil olunması və xarici tərəfdaşlarla birbaşa əlaqələr qurması biznesin inkişafı baxımından əhəmiyyətlidir.

Xarici iş adamlarının Azərbaycana səfərlərində turizm şirkətlərinin rolu artır

R.Qasımov bildirib ki, beynəlxalq iqtisadi əməkdaşlığın genişlənməsi turizm sektorunda fəaliyyət göstərən şirkətlər üçün də yeni imkanlar yarada bilər.

O qeyd edib ki, xarici investorların, iş adamlarının və nümayəndə heyətlərinin Azərbaycana səfərlərinin təşkili xüsusi xidmət və koordinasiya tələb edir.

“Biz turizm sahəsində destinasiya menecmenti xidmətləri göstəririk. Xarici nümayəndə heyətlərinin Azərbaycanda qəbulu, onların hava limanında qarşılanması, səfər proqramlarının təşkili və yola salınması bu fəaliyyətin əsas istiqamətlərindəndir. ABA Travel-in bu sahədə kifayət qədər böyük təcrübəsi var. Dünyanın müxtəlif ölkələrindən nümayəndə heyətlərini qəbul etmişik. Xarici tərəfdaşlarımız şirkətimizin vasitəsilə rahat və keyfiyyətli xidmətlərdən yararlanıblar”, – deyə şirkət direktoru vurğulayıb.

ABA Travel beynəlxalq tərəfdaşlıq imkanlarını genişləndirməyi hədəfləyir

Şirkət direktoru bildirib ki, beynəlxalq biznes tədbirlərində turizm sektorunun təmsil olunması xarici tərəfdaşlıq əlaqələrinin inkişafına müsbət təsir göstərə bilər.

Onun sözlərinə görə, xüsusilə işgüzar səfərlərin təşkili zamanı yerli turizm şirkətlərinin xidmətlərinə ehtiyac yaranır.

“Düşünürük ki, bu platforma ABA Travel-in biznes tərəfdaşları portfelinin genişlənməsinə də şərait yaradacaq. Turizm sektorunda çalışan sahibkarların beynəlxalq əməkdaşlıq platformalarına inteqrasiyası çox vacibdir. Xaricdən gələn nümayəndə heyətlərinin vaxtı adətən məhdud olur. Buna görə də səfər etdikləri ölkədə onların bütün təşkilati məsələlərini həll edən, səfər proqramını koordinasiya edən etibarlı şirkətə ehtiyac yaranır. ABA Travel də Azərbaycanda bu istiqamətdə fəaliyyət göstərən şirkətlərdən biridir”, – deyə R.Qasımov bildirib.

Şirkət rəhbəri hesab edir ki, beynəlxalq biznes əlaqələrinin genişlənməsi turizm xidmətlərinə olan tələbatın artmasına və yerli şirkətlərin xarici tərəfdaşlarla əməkdaşlığının inkişafına imkan yarada bilər.

Bakıda Azərbaycan, Türkiyə və ABŞ arasında biznes əməkdaşlığı müzakirə olunub

Qeyd edək ki, oktyabrın 22-də “Radisson Hotel Baku”da “TABA-AmCham Eurasia Investment & Networking Summit 2026” beynəlxalq sammiti keçirilib.

“Connecting Investments, Building the Future” (“İnvestisiyaları birləşdiririk, gələcəyi qururuq”) şüarı altında təşkil olunan tədbir Azərbaycan, Türkiyə və ABŞ arasında iqtisadi əməkdaşlığın inkişaf etdirilməsinə, qarşılıqlı investisiyaların artırılmasına və yeni biznes tərəfdaşlıqlarının qurulmasına həsr olunub.

Sammitin gündəliyində enerji, logistika, texnologiya, rəqəmsal transformasiya, beynəlxalq ticarət və strateji investisiya imkanları yer alıb.

Tədbir çərçivəsində müxtəlif sahələrdə fəaliyyət göstərən sahibkarların, investorların və şirkət rəhbərlərinin bir araya gəlməsi yeni əməkdaşlıq imkanlarının müzakirəsinə şərait yaradıb.