2025-ci ildə Baş Prokurorluğun İstintaq idarəsi tərəfindən 83 şəxs barəsində 61 cinayət işinin ibtidai istintaqı aparılaraq baxılması üçün məhkəmələrə göndərilib. Bunlardan 6 şəxs barəsində 5 iş qəsdən adam öldürmə faktları ilə bağlı olub.
PostNews xəbər verir ki, məlumat Baş Prokurorluqda 2025-ci ildə görülmüş işlərin və qarşıda duran vəzifələrin müzakirəsinə dair kollegiya iclasında təqdim edilib.
Kollegiya iclasında vurğulanıb ki, daxili işlər orqanları ilə birgə keçirilmiş peşəkar istintaq-əməliyyat tədbirləri nəticəsində ötən illərdən bağlı qalmış 4 qəsdən adam öldürmə cinayəti açılıb və həmin işlər üzrə ibtidai istintaq davam etdirilir.
Hesabat dövründə ölkə ərazisində 31,852 cinayət qeydə alınmış, onların 90,5%-i açılmış, ümumilikdə isə ölkə üzrə 15,766 cinayət işinin istintaqı tamamlanmışdır. Bunlardan 1,063 iş prokurorluq orqanlarında istintaq edilmişdir.
