2025-ci ildə Azərbaycanda bankların kredit portfeli 30,1 milyard manat olub

2025-ci il ərzində Azərbaycanda bankların kredit portfeli 1,3% və ya 377,5 milyon manat artaraq 30,1 milyard manat təşkil edib.

PostNews Azərbaycan Mərkəzi Bankına istinadən xəbər verir ki, kredit portfelinin strukturuna görə, biznes kreditlərinin payı 53,6% (16,1 milyard manat), istehlak kreditlərinin payı 31,1% (9,4 milyard manat), ipoteka kreditlərinin payı isə 15,4% (4,562 milyard manat) olub.

Bankların öhdəliklərinin strukturunda ənənəvi olaraq depozit portfeli üstünlük təşkil edir. Ümumi öhdəliklərin 76,8%-i və ya 38,2 milyard manat depozitlərdən ibarətdir.

Depozit portfelinin 57,3%-i (21,9 milyard manat) hüquqi şəxslərin, 42,7%-i (16,3 milyard manat) isə fiziki şəxslərin əmanətlərinin payına düşür. Qeyd olunur ki, fərdi sahibkarlıq fəaliyyəti ilə məşğul olan fiziki şəxslərin depozitləri bu göstəriciyə daxil deyil.

Fiziki şəxslərin əmanətlərinin 68,5%-i (11,2 milyard manat) milli valyutada, 31,5%-i (5,1 milyard manat) isə xarici valyutada yerləşdirilib. Eyni zamanda, fiziki şəxslərin depozit portfelinin 63,2%-i (10,3 milyard manat) müddətli əmanətlərdən ibarətdir.

Dekabr ayında fiziki şəxslərin müddətli əmanətləri 3,5% (352,1 milyon manat), tələb olunanadək əmanətləri isə 2,1% (123,7 milyon manat) artıb.