2025-ci il ərzində Azərbaycanın aviasiya sektoru dayanıqlı inkişaf trayektoriyasını qoruyub saxlayıb, artan tranzit potensialı və beynəlxalq etimadın möhkəmlənməsi ilə xarakterizə olunub. Ölkənin hava məkanında 342 mindən çox uçuşa xidmət göstərilməsi, 2024-cü illə müqayisədə 10,5% artımın qeydə alınması aviasiya infrastrukturunun etibarlılığını və Azərbaycanın regional nəqliyyat qovşağı kimi mövqeyinin gücləndiyini nümayiş etdirir.
PostNews xəbər verir ki, bu barədə Heydər Əliyev Beynəlxalq Aeroportunun mətbuat xidməti məlumat yayıb.
Bildirilib ki, hava hərəkətinin ən intensiv dövrü yay aylarına təsadüf edib. 9 avqust 2025-ci il tarixində bir sutka ərzində 1 101 uçuşun idarə edilməsi ilə Azərbaycan aviasiyası tarixində rekord göstərici qeydə alınıb.
İl ərzində uçuşların 76%-ni – 261 mindən çoxunu tranzit reyslər təşkil edib. Tranzit uçuşlarda təxminən 14%-lik artım müşahidə olunub.
Azərbaycan hava məkanından tranzit istifadə edən aparıcı qlobal aviaşirkətlər sırasında:
- Turkish Airlines
- Singapore Airlines
- Cathay Pacific
- Thai Airways
- Lufthansa yer alıb.
2025-ci il ərzində Heydər Əliyev Beynəlxalq Aeroportunda 7 milyon 640 mindən çox sərnişinə xidmət göstərilib.
Beynəlxalq istiqamətlər üzrə daşınan sərnişinlərin sayı 6 milyon 895 min təşkil edib.
Bu həcmin 51,2%-i xarici aviaşirkətlərin, 3 milyon 362 min sərnişin isə milli aviadaşıyıcının payına düşüb.
İl ərzində hava limanından 40 xarici aviaşirkət tərəfindən 75 beynəlxalq istiqamət üzrə reyslər həyata keçirilib.
Ən çox seçilən istiqamətlər:
İstanbul, Tbilisi, Dubay, Ankara və Moskva olub.
Eyni zamanda Heydər Əliyev Beynəlxalq Aeroportu üzərindən tranzit daşınan sərnişinlərin sayı 974 mindən çox olub.
Bu göstərici 2024-cü ildə qeydə alınan 750 minlə müqayisədə təxminən 30% artım deməkdir.
2025-ci ildə AZAL aviaşirkəti tərəfindən 4,16 milyon sərnişin daşınıb.
Bakı–Naxçıvan istiqamətində sərnişinlərin sayı 735 min təşkil edib.
Sərnişin dövriyyəsində 2%-lik artım qeydə alındığı halda, bu marşrut üzrə icra olunan uçuşların sayı 6% artaraq 7 min 261 uçuşa çatıb.
2025-ci il Azərbaycanın aviasiya tarixində mühüm strateji mərhələ kimi yadda qalıb. İşğaldan azad edilmiş ərazilərdə inşa olunan üçüncü beynəlxalq aeroport – Laçın Beynəlxalq Hava Limanı istifadəyə verilib.
Eyni zamanda Heydər Əliyev Beynəlxalq Aeroportu 2025-ci ildə növbəti dəfə “Skytrax World Airport Awards” çərçivəsində “Mərkəzi Asiya və MDB-nin ən yaxşı hava limanı” adına layiq görülüb.
Hava limanı:
- “Airport Carbon Accreditation (ACA)” – 3-cü səviyyə
- “Airport Service Quality (ASQ)” proqramı
- “APEX in Safety” təhlükəsizlik qiymətləndirməsi
üzrə uğurlu nəticələr əldə edib.
Bu dövrdə “Azəraeronaviqasiya” Hava Hərəkatı İdarəsi (AZANS):
- CANSO ANSP Sammiti
- “Airspace World 2025”
tədbirlərində iştirak edib, Böyük Britaniyanın NATS təşkilatı ilə strateji əməkdaşlıq qurub.
AZANS, həmçinin “ATM Awards 2024” çərçivəsində “Collaboration and Community” nominasiyası üzrə qalib elan olunub.
Beləliklə, 2025-ci ilin yekunları Azərbaycanın aviasiya sektorunun beynəlxalq inteqrasiya, təhlükəsizlik və strateji liderlik istiqamətində ardıcıl inkişaf etdiyini təsdiqləyir.
