“PAŞA Bank” IPO-dan sonra nizamnamə kapitalını artırmağa hazırlaşır

“PAŞA Bank” ASC-nin səhmdarlarının növbəti ümumi yığıncağı 2026-cı il noyabrın 16-da keçiriləcək. Yığıncaqda bankın səhmlərinin ilkin kütləvi təklif (IPO) üsulu ilə yerləşdirilməsinin yekunları nəzərə alınmaqla nizamnamə kapitalının artırılması və bununla bağlı nizamnaməyə dəyişiklik edilməsi məsələləri müzakirə olunacaq.

PostNews xəbər verir ki, səhmdarların ümumi yığıncağı telekommunikasiya vasitəsilə məsafədən təşkil ediləcək.

“PAŞA Bank”ın nizamnamə kapitalının artırılması müzakirə ediləcək

Yığıncağın gündəliyinə bankın emissiya etdiyi səhmlərin IPO üsulu ilə yerləşdirilməsinin nəticələri əsasında nizamnamə kapitalının artırılması məsələsi daxil edilib.

Bununla əlaqədar bankın nizamnaməsinə müvafiq dəyişikliklərin edilməsi nəzərdə tutulur.

Gündəliyə əsasən, “Banklar haqqında” Qanuna uyğun olaraq nizamnaməyə dəyişiklik edilməsinə razılıq alınması üçün Azərbaycan Mərkəzi Bankına (AMB) müraciət olunması da müzakirə ediləcək.

İdarə Heyətinin sədrinə əlavə səlahiyyətlər veriləcək

Yığıncaqda nəzərdə tutulan digər məsələ nizamnamə dəyişikliyi və qəbul ediləcək qərarların icrası ilə bağlı səlahiyyətlərin müəyyənləşdirilməsidir.

Gündəliyə əsasən, müvafiq səlahiyyətlərin “PAŞA Bank”ın İdarə Heyətinin sədri Cavid Həsən oğlu Quliyevə həvalə edilməsi təklif olunur.

Bu səlahiyyətlərə aşağıdakılar daxildir:

• Bankın nizamnaməsinə ediləcək dəyişikliyin imzalanması;
• Səhmdarların ümumi yığıncağının qərarlarının icrası üçün zəruri tədbirlərin görülməsi;
• Azərbaycan Mərkəzi Bankına və İqtisadiyyat Nazirliyi yanında Dövlət Vergi Xidmətinə müraciət edilməsi;
• Bankın dövlət və qeyri-dövlət qurumları qarşısında təmsil olunması;
• Zəruri sənədlərin imzalanması və digər müraciətlərin həyata keçirilməsi.

“PAŞA Bank”ın səhmdarları kimlərdir?

“PAŞA Bank” ASC 2007-ci ildə yaradılıb.

Təqdim edilən səhmdar strukturu üzrə bankın səhmlərinin 53,97%-i “PAŞA Maliyyə Holdinqi” MMC-yə məxsusdur.

Bankın digər səhmdarları sırasında “Bless” MMC, Arif Paşayev, Mircamal Paşayev və fiziki şəxslər yer alır.

Səhmdarların pay bölgüsü aşağıdakı kimidir:

Mircamal Paşayev həmçinin bankın Müşahidə Şurasının sədridir.

Noyabrın 16-da keçiriləcək yığıncaqda IPO-nun yekunları nəzərə alınmaqla nizamnamə kapitalının artırılması və bununla bağlı korporativ prosedurların həyata keçirilməsi məsələlərinə baxılacaq.