Azərbaycanda pul-kredit siyasəti çərçivələrinin təkmilləşdirilməsi ölkənin xarici mövqelərinin dayanıqlığının möhkəmlənməsinə töhfə verir.
PostNews xəbər verir ki, bu barədə beynəlxalq reytinq agentliyi “Moody’s”in hesabatında bildirilib. Agentliyin məlumatına görə, Azərbaycanın suveren reytinqləri, o cümlədən uzunmüddətli emitent reytinqi “Baa3” səviyyəsindədir və dövlətin xalis kreditor mövqeyi ilə dəstəklənir. Bu mövqe əsasən Azərbaycanın Dövlət Neft Fondunda (SOFAZ) toplanmış iri maliyyə aktivləri hesabına formalaşıb.
Qeyd olunub ki, suveren rifah fondu funksiyasını yerinə yetirən SOFAZ mühüm maliyyə buferi rolunu oynayaraq dövlət sektorunun likvidlik və xarici həssaslıq risklərini azaldır.
“Moody’s” hesabatda iqtisadi siyasətin effektivliyinin tədricən artdığını da vurğulayır. Xüsusilə pul-kredit və makroiqtisadi siyasət sahəsində aparılan islahatlar xarici mövqelərin dayanıqlığını möhkəmləndirir və maliyyə sisteminin xarici şoklara qarşı davamlılığını artırır. Eyni zamanda fiskal ehtiyatlardan səmərəli istifadə əks-tsiklik büdcə siyasətinin aparılmasına və dövlətin fiskal və borc göstəricilərinin potensial pisləşməsinin qarşısının alınmasına imkan yaradır.
Agentlik bildirir ki, 2025-ci ildə dünya neft qiymətlərinin azalmasına baxmayaraq, Azərbaycan iqtisadiyyatı müsbət artım tempini qoruyub saxlayıb. Hesabat dövrünün ilk 11 ayında real ÜDM illik ifadədə 1,6% artıb və ilin yekununda iqtisadi artımın təxminən 1,5% təşkil edəcəyi gözlənilir. Bu nəticə neft və qaz hasilatında azalma fonunda qeyri-neft sektorunun nisbi dayanıqlılığını əks etdirir.
“Moody’s”in qiymətləndirməsinə əsasən, neft qiymətlərinin aşağı düşməsi və dövlət xərclərinin artması nəticəsində konsolidə olunmuş fiskal profisit 2025-ci ildə ÜDM-in təxminən 2,4%-nə enəcək. Bu göstərici 2024-cü ildə 4% səviyyəsində olub. Bununla yanaşı, infrastruktur layihələri, bərpa proqramları və sosial təşəbbüslərin maliyyələşdirilməsi fonunda dövlət büdcəsinin cüzi kəsirlə icra olunacağı proqnozlaşdırılır.
Agentlik əlavə edir ki, büdcə kəsirinin məhdud səviyyədə qalması dövlət borcunun ÜDM-in 30%-indən aşağı səviyyədə saxlanmasına imkan verəcək. Bu göstərici həm orta müddətli fiskal strategiyanın hədəflərinə, həm də oxşar kredit reytinqinə malik ölkələrin orta göstəricilərinə nisbətən daha əlverişli hesab olunur.
