Xankəndidə II Qarabağ Təhsil Forumu keçirilib – “ÖyrədənSƏN” devizi altında müəllimlər bir araya gəlib

PostNews – Xankəndi şəhərində 5 Oktyabr – Beynəlxalq Müəllimlər Gününə həsr olunan “VətəndəSƏN” II Qarabağ Təhsil Forumu keçirilib.

“ÖyrədənSƏN” devizi altında təşkil olunan forumun əsas məqsədi işğaldan azad edilmiş ərazilərdə təhsilin inkişafına töhfə vermək, təhsil sahəsində innovativ yanaşmaların tətbiqini təşviq etmək və Qarabağda təhsil mühitinin dirçəlişini dəstəkləmək olub.

Qarabağda təhsilin inkişafı müzakirə olunub

“VətəndəSƏN” II Qarabağ Təhsil Forumu “Karabakh Training Center” və “World” Təhsil və İnkişaf platformasının təşkilatçılığı, “AccessBank” QSC-nin tərəfdaşlığı ilə reallaşıb.

Tədbirdə Azərbaycanın müxtəlif bölgələrindən dəvət olunan Əməkdar müəllimlər, təhsil ekspertləri, dövlət rəsmiləri və təhsil sahəsinin nümayəndələri iştirak ediblər.

Forum Azərbaycan Respublikasının Dövlət Himninin səsləndirilməsi ilə başlayıb. Daha sonra Azərbaycanın ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.

İnsan kapitalının inkişafı və müəllim əməyinin rolu diqqət mərkəzində olub

Forumun rəsmi hissəsində “Karabakh Training Center”in rəhbəri Aytən Məmmədova, Qarabağ Universitetinin nümayəndəsi, Xankəndi şəhəri, Xocalı və Ağdərə rayonlarında Azərbaycan Respublikası Prezidentinin xüsusi məsul şəxsi Xasay Cahangirov, Qarabağ Ərazi Vergilər Baş İdarəsinin rəisi Ələkbər Məmmədov və digər qonaqlar çıxış ediblər.

Çıxışlarda işğaldan azad edilmiş ərazilərdə insan kapitalının inkişaf etdirilməsi, müəllim əməyinin qiymətləndirilməsi, regionda tətbiq olunan güzəşt və azadolmaların sosial-iqtisadi inkişafa təsiri, eləcə də təhsil sahəsində innovativ layihələrin həyata keçirilməsi məsələləri diqqət mərkəzində olub.

Müzakirələrdə Qarabağda formalaşmaqda olan yeni təhsil mühitinin inkişafında müəllimlərin və digər təhsil işçilərinin rolu da vurğulanıb.

Aytən Məmmədova: “Müəllimlərin təcrübəsi Qarabağın inkişafında dəyər yaradacaq”

Tədbirdə çıxış edən “Karabakh Training Center”in rəhbəri Aytən Məmmədova bildirib ki, mərkəz fəaliyyət göstərdiyi bir il ərzində müxtəlif tədbirlər, sərgilər, təlimlər və forumlar həyata keçirib.

O, müəllimlərin peşə bayramına həsr edilən II Qarabağ Təhsil Forumunun xüsusi əhəmiyyət daşıdığını vurğulayıb:

“Qarabağ Təlim Mərkəzi olaraq fəaliyyət göstərdiyimiz bu 1 il ərzində bir çox tədbirlər, sərgilər, təlimlər və forumlar keçirmişik. Ancaq bu gün keçirilən forum bizim üçün fərqli dəyərlidir, çünki bu forum məhz müəllimlər gününə həsr olunub və bugünkü forumumuzda müxtəlif regionlardan dəvət olunan Əməkdar müəllimlər, Prezident mükafatçıları yer alır. Onların təcrübəsi və forumda iştirak edən təhsil işçilərinin töhfəsi inanırıq ki, doğma Qarabağımızın inkişafında dəyər yaradacaq”.

Müəllimlər üçün peşəkar təlimlər və panel müzakirələri keçirilib

İki gün davam edən “VətəndəSƏN” II Qarabağ Təhsil Forumu yalnız rəsmi çıxışlarla məhdudlaşmayıb.

Forum proqramı çərçivəsində pedaqoji heyət üçün peşəkar təlimlər və panel müzakirələri təşkil olunub. Təhsil işçiləri müxtəlif mövzular ətrafında fikir və təcrübə mübadiləsi aparıblar.

Proqramda, həmçinin müəllimlərin peşə bayramına həsr edilmiş təntənəli Qala gecəsi, sərgi və Şuşa şəhərinə mədəni gəzinti yer alıb.

“VətəndəSƏN” II Qarabağ Təhsil Forumunun əsas məqsədi

Forumun əsas istiqamətlərindən biri Qarabağda təhsil ekosisteminin inkişafına dəstək vermək, müxtəlif regionlardan olan təcrübəli müəllim və ekspertlərin biliklərini bir araya gətirmək və innovativ təhsil yanaşmalarının tətbiqini təşviq etmək olub.

Xankəndidə keçirilən forum eyni zamanda təhsilin Qarabağın sosial-iqtisadi dirçəlişində və insan kapitalının formalaşdırılmasında rolunun müzakirəsi üçün platforma yaradıb.

“ÖyrədənSƏN” devizi altında bir araya gələn təhsil nümayəndələrinin təcrübə mübadiləsi, peşəkar təlimlər və müzakirələr vasitəsilə regionda təhsil mühitinin inkişafına töhfə verməsi forumun əsas hədəflərindən biri kimi müəyyənləşdirilib.

 

1 of 4

- +

1.

2.

3.

4.