Mərkəzi qərargahı Ankara şəhərində yerləşən Sənaye və Ticarət Konfederasiyasının (SANKON) Baş Qərargahı tanınmış iş adamı Dilşad Əhədovanın təşkilatın Azərbaycan Respublikası üzrə rəsmi nümayəndəsi təyin olunduğunu açıqlayıb.
SANKON tərəfindən yayılan məlumatda bildirilib ki, Dilşad Əhədova konfederasiyanı Azərbaycan Respublikası hökuməti və ölkənin biznes ictimaiyyəti qarşısında ən yüksək səviyyədə təmsil etmək səlahiyyətinə malikdir.
Məlumatda qeyd olunub ki, Dilşad Əhədova Azərbaycan Respublikasının vətəndaşıdır və eyni zamanda “Adalia International Ladies Platform” təşkilat-şirkətinin Direktorlar Şurasının sədri vəzifəsini icra edir.
Açıqlamada vurğulanıb ki, bu təyinatın SANKON ilə Azərbaycan arasında sənaye, ticarət və beynəlxalq biznes əlaqələrinin daha da genişlənməsinə mühüm töhfə verəcəyi gözlənilir.
SANKON-un fəaliyyətinin beynəlxalq əməkdaşlıq və “qazan–qazan” prinsipi üzərində qurulduğu qeyd edilir
Məlumat üçün bildirilib ki, Sənaye və Ticarət Konfederasiyası (SANKON) beynəlxalq və iqtisadi yönümlü qeyri-hökumət təşkilatı kimi fəaliyyət göstərir. Konfederasiyanın tərkibində investorlar, sənayeçilər, iş qadınları və iş adamları təmsil olunurlar.
Qurumun Türkiyə, Türk Cümhuriyyətləri, Ərəb Dövlətləri, Afrika, Balkan, Latın Amerikası və Avropa ölkələri də daxil olmaqla, dünyanın müxtəlif regionlarında ümumilikdə 193 nümayəndəliyi fəaliyyət göstərir.
Bildirilib ki, SANKON nümayəndələri Baş Qərargahla koordinasiyalı şəkildə çalışaraq, müvafiq ölkələrdə milli və beynəlxalq layihələr həyata keçirən investorları, Türkiyədə fəaliyyət göstərən aktiv iş qadınları və iş adamlarından ibarət sənayeçilərlə bir araya gətirməkdə mühüm rol oynayırlar.
Qeyd olunub ki, SANKON bu qurumlar, strukturlar və şirkətlər arasında milli və beynəlxalq əməkdaşlığa mane ola biləcək bürokratik əngəllərin minimuma endirilməsi məqsədilə ortaq platforma formalaşdırır və fəaliyyətini heç bir ayrı-seçkilik etmədən, daim “qazan–qazan” prinsipi əsasında davam etdirir.
SANKON-un əsas hədəfləri sırasında qadın və kişi bərabərliyinin təşviqi yer alır
Açıqlamada vurğulanıb ki, SANKON-un əsas məqsədlərindən biri qadın və kişilərin sosial-iqtisadi baxımdan cəmiyyətin bütün sahələrində aktiv iştirakını təmin etmək, iş dünyasında isə təsirli və səlahiyyətli mövqelərə yüksəlmələrinə şərait yaratmaqdır.
Bu çərçivədə cinsiyyət ayrı-seçkisi olmadan, iş dünyasında qadın və kişi bərabərliyi balansının qorunması, milli və beynəlxalq müstəvidə bərabər rəqabət imkanlarının yaradılması və iş qadınları ilə iş adamlarının beynəlxalq arenada investisiya həyata keçirmələrinin təşviqi əsas hədəflər sırasında göstərilir.
Eyni zamanda qeyd edilib ki, SANKON iş dünyasını beynəlxalq platformada təmsil edən vətəndaş cəmiyyəti təşkilatı kimi fəaliyyət göstərir və bu çərçivədə Türkiyə ilə digər dövlətlər arasında idxal və ixracın artırılmasını, dövlətlər və xalqlar arasında ticarət əlaqələrinin qurulmasını və mövcud münasibətlərin daha da möhkəmləndirilməsini prioritet məqsədlərdən biri hesab edir.
