2025-ci ildə Azərbaycanda sənaye sektoru üzrə əsas kapitala yönəldilmiş investisiyaların dəyəri 7,916 milyard manat təşkil edib.
PostNews Dövlət Statistika Komitəsinə istinadən xəbər verir ki, bu göstərici 2024-cü ilin müvafiq dövrü ilə müqayisədə 1% azdır.
Sənaye sektoruna yönəldilmiş investisiyaların yekunda xüsusi çəkisi 37,3% olub. Hesabat dövründə sərmayələrin 5,213 milyard manatı mədənçıxarma sənayesinə (+4,4%), 636,7 milyon manatı emal sənayesinə (-55,6%), 1,711 milyard manatı elektrik enerjisi, qaz və buxar istehsalı, bölüşdürülməsi və təchizatına (+27,4%), 354,8 milyon manatı isə su təchizatı, tullantıların təmizlənməsi və emalına (+57,6%) yönəldilib.
Qeyd olunur ki, 2025-ci ildə ölkənin iqtisadi və sosial sahələrinin inkişafı üçün bütün maliyyə mənbələrindən əsas kapitala 21,226 milyard manat sərmayə yatırılıb ki, bu da 2024-cü illə müqayisədə 5,6% azdır. Neft-qaz sektoruna yönəldilmiş investisiyaların həcmi 10,3%, qeyri-neft-qaz sektoruna yönəldilmiş investisiyaların həcmi isə 3,9% azalıb.
Ümumi sərmayənin 10,972 milyard manatı və ya 51,7% məhsul istehsalı sahələrinin, 7,180 milyard manatı (33,8%) xidmət sahələrinin, 3,074 milyard manatı (14,5%) isə yaşayış evlərinin tikintisinin payına düşüb.
Hesabat dövründə sərmayələrin 53,2% dövlət, 46,8% isə qeyri-dövlət sektorunun sərmayədarları tərəfindən qoyulub. Sərmayə qoyuluşunun 75,5% tikinti-quraşdırma işlərinə sərf olunub, daxili mənbələrdən əsas kapitala yönəldilmiş investisiyanın dəyəri isə ümumi sərmayənin 80,2%-ni təşkil edib.
