BVF: Avrozona və Avstraliya üzrə inflyasiya sabit qalacaq

Beynəlxalq Valyuta Fondu (BVF) bildirib ki, qlobal baza inflyasiyasının 2026-cı ildə 3,8 faiz, 2027-ci ildə isə 3,4 faiz səviyyəsində qalacağı gözlənilir.

PostNews xəbər verir ki, bu məlumat BVF-nin “World Economic Outlook 2026” hesabatının yanvar buraxılışından əldə olunub. Hesabatda qeyd olunur ki, proqnozlar 2025-ci ilin oktyabr hesabatı ilə müqayisədə faktiki olaraq dəyişməz qalıb, əsas tendensiyalar isə tələbin zəifləməsi və enerji resurslarının qiymətlərinin enməsi olaraq qorunub.

BVF analitikləri bildirirlər ki, ABŞ-da yüksək tariflərin təsirləri tədricən əks olunacaq və baza inflyasiya 2027-ci ildə 2 faiz hədəf səviyyəsinə qayıdacaq.

Eyni zamanda, Avstraliya və Norveçdə inflyasiya uzun müddət hədəf səviyyədən yuxarı qalacaq, Böyük Britaniyada isə 2026-cı ilin sonuna doğru inflyasiyanın hədəf səviyyəyə qayıdacağı gözlənilir. Yaponiyada ərzaq və xammal qiymətlərinin azalması nəticəsində inflyasiyanın 2026-cı ildə yumşalacağı və 2027-ci ildə hədəf səviyyəyə yaxınlaşacağı proqnozlaşdırılır.

BVF hesab edir ki, Avrozona üzrə ümumi inflyasiya təxminən 2 faiz səviyyəsində qalacaq, baza inflyasiya isə 2027-ci ildə 2 faiz olacaq.

Çində isə inflyasiyanın aşağı səviyyələrdən başlayaraq artacağı, Hindistanda isə 2025-ci ildə ərzaq qiymətlərinin aşağı olması səbəbindən qeydə alınmış düşüşdən sonra inflyasiyanın yenidən hədəf səviyyəyə qayıdacağı proqnozlaşdırılır.