Azərbaycan Rəssamlıq Akademiyasının “Rəngkarlıq və Təsviri incəsənət müəllimliyi” kafedrasının professoru, Əməkdar rəssam Tahir Məmmədovun “Torpaq, Külək və Od” adlı fərdi sərgisinin 3 fevral tarixində QGallery sərgi məkanında açıldığı bildirilib.
Məlumata görə, sərgidə rəssamın son beş il ərzində ərsəyə gətirdiyi əsərlər nümayiş olunur. Bildirilib ki, Tahir Məmmədovun yaradıcılığı beynəlxalq miqyasda tanınır və onun əsərləri Tretyakov Qalereyasında, Şərq İncəsənəti Muzeyində, Paris və Belçika sərgi məkanlarında, həmçinin ABŞ, Yaponiya, Almaniya və Türkiyədə şəxsi kolleksiyalarda saxlanılır.
Qeyd olunub ki, rəssam indiyədək ABŞ, Paris, Belçika və Moskva şəhərlərində fərdi sərgilərlə çıxış edib və beynəlxalq sənət mühitində fəal iştirak edib.
Sərginin açılışında sənət adamlarının və ictimai xadimlərin iştirak etdiyi vurğulanıb
Açıqlamada bildirilib ki, sərginin açılış mərasimində Azərbaycan Rəssamlar İttifaqının və Azərbaycan Rəssamlıq Akademiyasının nümayəndələri, tanınmış sənət adamları və ictimai xadimlər iştirak ediblər. Çıxışlar zamanı Tahir Məmmədovun yaradıcılığına və onun Azərbaycan incəsənətinə verdiyi töhfələrə xüsusi diqqət çəkilib.
Məlumata əsasən, sərginin 10 fevral 2026-cı il tarixinədək davam edəcəyi bildirilib.
