Azərbaycanın işğaldan azad edilmiş ərazilərində bərpa və yenidənqurma işlərinin maliyyələşdirilməsi üçün 2030-cu ilədək ümumilikdə 22,82 milyard ABŞ dolları həcmində dövlət investisiyalarının həyata keçirilməsi nəzərdə tutulur. Bu vəsaitin 12,94 milyard dolları 2020–2025-ci illərdə ayrılıb, 2026-cı il üçün 2,06 milyard dollar nəzərdə tutulub.
PostNews xəbər verir ki, bu barədə İqtisadi İslahatların Təhlili və Kommunikasiya Mərkəzinin (İİTKM) 8 Noyabr – Zəfər Günü münasibətilə hazırladığı “Invest in Garabagh and Eastern Zangezur” (Qarabağ və Şərqi Zəngəzura investisiya) icmalının üçüncü xüsusi buraxılışında bildirilib.
İcmalda qeyd olunub ki, müvafiq Dövlət Proqramı çərçivəsində Qarabağ və Şərqi Zəngəzurun bərpası və inkişafı üçün nəzərdə tutulan dövlət investisiyalarının ilkin ümumi dəyəri 22,82 milyard dollar qiymətləndirilir.
Dövlət investisiyalarının illər üzrə bölgüsü
İcmalda təqdim olunan məlumatlara əsasən, 2020–2025-ci illərdə dövlət büdcəsindən azad edilmiş ərazilərin bərpası və yenidən qurulması üçün 12,94 milyard dollar ayrılıb.
2026-cı ilin dövlət büdcəsində bu məqsədlər üçün 2,06 milyard dollar vəsait nəzərdə tutulub. 2027–2030-cu illərdə isə əlavə olaraq 7,82 milyard dolların yönəldilməsi proqnozlaşdırılır.
Beləliklə, ayrılmış, cari il üçün nəzərdə tutulmuş və növbəti illər üzrə proqnozlaşdırılan investisiyaların ümumi həcmi 22,82 milyard dollara çatır.
Qarabağ və Şərqi Zəngəzurda kredit portfeli açıqlanıb
İcmalda azad edilmiş ərazilərdə bank kreditlərinin həcmi və müddətlər üzrə bölgüsü barədə də məlumat verilib.
2026-cı il sentyabrın 1-nə Qarabağ iqtisadi rayonunda kredit portfelinin ümumi həcmi 349,1 milyon dollar təşkil edib. Bunun 328,2 milyon dolları uzunmüddətli, 20,9 milyon dolları isə qısamüddətli kreditlərin payına düşüb.
Şərqi Zəngəzur iqtisadi rayonunda kredit portfelinin həcmi 22,6 milyon dollar olub. Bu məbləğin 14,5 milyon dolları uzunmüddətli, 8,1 milyon dolları isə qısamüddətli kreditlərdən ibarətdir.
Beləliklə, 2026-cı il sentyabrın 1-nə Qarabağ və Şərqi Zəngəzur iqtisadi rayonları üzrə ümumi kredit portfeli 371,7 milyon dollar təşkil edib.



