Azərbaycanda əhalinin faktiki yaşayış yerinə əsaslanan vahid məlumat bazasının yaradılmasına başlanılıb.
PostNews xəbər verir ki, bunu İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev “2025-ci ilin yekunları və hədəflər” mövzusunda keçirilən mətbuat konfransında bildirib.
Onun sözlərinə görə, artıq təhkimolunma prosesinə start verilib və 2025-ci ildə bu proses 3,5 milyon nəfəri əhatə edəcək. Müqayisə üçün qeyd olunub ki, ötən il təhkimolunan əhalinin sayı 2,5 milyon nəfər olub.
Zaur Əliyev həmçinin bildirib ki, 2026-cı ilin birinci rübündə Bərdə rayonunun əksər kəndləri modul tipli tibb məntəqələri ilə təmin ediləcək.
Bununla yanaşı, ölkə üzrə səhiyyə infrastrukturunun optimallaşdırılması da nəzərdə tutulur. Belə ki:
- 78 Ailə Sağlamlıq Mərkəzi,
- 871 həkim məntəqəsi,
- 1168 tibb məntəqəsi,
- Bakı şəhərində 106 ambulator-poliklinik müəssisə optimallaşdırılacaq.
Qeyd edək ki, bu tədbirlər icbari tibbi sığorta çərçivəsində əhalinin tibbi xidmətlərə çıxışının yaxşılaşdırılmasına və səhiyyə resurslarının daha səmərəli istifadəsinə xidmət edir.
