Çin 13 Rusiya balıqçılıq şirkətinə öz məhsullarını ölkə bazarına tədarük etmək üçün rəsmi icazə verib.
PostNews xəbər verir ki, bu barədə Rusiya Baytarlıq və Fitosanitar Nəzarət üzrə Federal Xidməti – Rosselxoznadzor Çinin Baş Ərazi Administrasiyasının qərarına istinadən məlumat yayıb.
Məlumata görə, icazə alan şirkətlərdən altısı Saxalin vilayətində fəaliyyət göstərir. Onların sırasında iki soyuducu nəqliyyat gəmisi də yer alır. Bundan əlavə, Kamçatka vilayətindən üç balıqçılıq şirkəti Çin bazarına çıxış hüququ əldə edib. Digər təsdiqlənmiş müəssisələr isə Primorsk diyarı, Murmansk vilayəti və Arxangelsk vilayətində fəaliyyət göstərir.
Qeyd olunur ki, yeni təchizatçılar Çinin CIFER informasiya sistemi vasitəsilə rəsmi qeydiyyata alınıb. Bununla da Çinə Rusiya balıq və dəniz məhsulları ixrac edən şirkətlərin ümumi sayı 939-a yüksəlib.
Rosselxoznadzorun məlumatına əsasən, Rusiya 2025-ci ildə 1,5 milyon tondan çox balıq və dəniz məhsulu ixrac edib. Bu həcmin 843 min tonu, yəni yarıdan çoxu Çin bazarına göndərilib. Statistik göstəricilər Çinin Rusiya balıq sənayesi üçün əsas və strateji ixrac bazarlarından biri olduğunu bir daha təsdiqləyir.
