2026-cı ilin III rübündə Azərbaycanda qiymətli kağızlar üzrə nominal ödənişlərin həcmi 1 milyard 286,1 milyon manata çatıb. Bu, əvvəlki rüblə müqayisədə 228,4 milyon manat və ya 21,6% çoxdur. Artım əsasən Mərkəzi Bankın notları üzrə ödənişlərin təxminən 2,6 dəfə yüksəlməsi ilə bağlıdır.
PostNews xəbər verir ki, bu barədə Milli Depozit Mərkəzi (MDM) məlumat yayıb.
MDM-in məlumatına görə, hesabat dövründə nominal ödənişlərin əsas hissəsi Mərkəzi Bankın notları və dövlət istiqrazları üzrə həyata keçirilib.
Mərkəzi Bankın notları üzrə ödənişlər artıb
2026-cı ilin III rübündə Mərkəzi Bankın notları üzrə nominal ödənişlərin həcmi 915,8 milyon manat təşkil edib. II rübdə bu göstərici 355,4 milyon manat olub. Beləliklə, notlar üzrə ödənişlər əvvəlki rüblə müqayisədə təxminən 2,6 dəfə artıb.
Dövlət istiqrazları üzrə nominal ödənişlər isə azalıb. Belə ki, II rübdə 660,9 milyon manat təşkil edən bu göstərici III rübdə 325,3 milyon manata enib.
Korporativ istiqrazlar üzrə nominal ödənişlərin həcmi isə əksinə, artıb. II rübdə 41,5 milyon manat olan ödənişlər III rübdə 45 milyon manata yüksəlib.
Kupon ödənişlərinin həcmi necə dəyişib?
Hesabat dövründə manatla ifadə olunan qiymətli kağızlar üzrə kupon ödənişlərinin həcmi 131,1 milyon manat təşkil edib. II rübdə bu məbləğ 152,9 milyon manat olub.
ABŞ dolları ilə ifadə olunan qiymətli kağızlar üzrə kupon ödənişləri isə artım göstərib. Belə ki, II rübdə 9,37 milyon dollar təşkil edən ödənişlər III rübdə 13,97 milyon dollara çatıb.
Manatla ifadə olunan qiymətli kağızlar üzrə kupon ödənişlərinin strukturunda dövlət istiqrazlarının payı daha böyük olub. III rübdə dövlət istiqrazları üzrə 121,2 milyon manat, korporativ istiqrazlar üzrə isə 9,9 milyon manat kupon ödənişi həyata keçirilib.
Dividend ödənişləri 253,5 milyon manat olub
Bundan əlavə, 2026-cı ilin II və III rübləri ərzində ümumi dividend ödənişlərinin həcmi 253,5 milyon manat təşkil edib.
MDM-in açıqlamasına əsasən, bu göstəriciyə Mərkəzin ödəniş agenti qismində çıxış etdiyi korporativ şirkətlər, o cümlədən maliyyə institutları üzrə həyata keçirilən dividend ödənişləri daxildir.



