Qarabağ Dirçəliş Fondu qarşıdakı 3-4 il ərzində Qarabağda biznesin dəstəklənməsi məqsədilə təxminən 500 milyon manat investisiya yatırmağı planlaşdırır. Bu istiqamətdə İqtisadiyyat Nazirliyi ilə birlikdə yeni dəstək proqramı hazırlanır.
PostNews xəbər verir ki, bunu Qarabağ Dirçəliş Fondunun İdarə Heyətinin sədri Rəhman Hacıyev AIREX 2026 beynəlxalq daşınmaz əmlak və investisiya sərgisi çərçivəsində bildirib.
Onun sözlərinə görə, fond İqtisadiyyat Nazirliyi ilə birgə biznesin dəstəklənməsinə yönəlmiş yeni proqram üzərində işləyir. Proqramın həyata keçirilməsi çərçivəsində qarşıdakı 3-4 il ərzində Qarabağda biznes fəaliyyətinin inkişafına təxminən 500 milyon manat investisiya yatırılması nəzərdə tutulur.
Daşınmaz əmlak bazarı Qarabağın dirçəldilməsində mühüm rol oynayır
Rəhman Hacıyev daşınmaz əmlak bazarının inkişafının Qarabağın dirçəldilməsi və “Böyük Qayıdış” proqramının həyata keçirilməsi baxımından əsas amillərdən biri olduğunu vurğulayıb.
O bildirib ki, Qarabağa daşınmaz əmlak sahəsində biznes üçün geniş imkanlar təqdim edən yeni bazar kimi yanaşmaq lazımdır.
Fondun İdarə Heyətinin sədrinin sözlərinə görə, regionda yeni daşınmaz əmlak obyektlərinin yaradılması müasir layihələrin həyata keçirilməsi, yeni standartların tətbiqi və qabaqcıl təcrübənin istifadəsi üçün imkanlar açır.
Rəhman Hacıyev hesab edir ki, bu istiqamətdə biznes fəallığının artması Qarabağda iqtisadi inkişaf prosesinə töhfə verə bilər.



