2027-ci ilin dövlət büdcəsində məhkəmə hakimiyyəti, hüquq-mühafizə və ədliyyə orqanlarının saxlanılması üçün nəzərdə tutulan vəsait 2025-ci illə müqayisədə 17%, 2026-cı illə müqayisədə isə 3% artırılır.
PostNews xəbər verir ki, bu barədə Milli Məclisin Hüquq siyasəti və dövlət quruculuğu komitəsinin sədri, deputat Əli Hüseynli parlamentin dörd komitəsinin birgə iclasında “Azərbaycan Respublikasının 2027-ci il dövlət büdcəsi haqqında” qanun layihəsinin müzakirəsi zamanı bildirib.
Deputat qeyd edib ki, təqdim olunan büdcə sənədləri ölkə iqtisadiyyatının qlobal qeyri-müəyyənliklər fonunda dayanıqlılığını nümayiş etdirir. Onun sözlərinə görə, 2027-ci ildə hərbi sahənin və hərbi sənaye kompleksinin inkişafı, Qarabağ və Şərqi Zəngəzurun bərpası, eləcə də əhalinin həssas təbəqəsinin sosial rifahının yaxşılaşdırılması üçün dövlət büdcəsində vəsait nəzərdə tutulub.
Ə.Hüseynli Azərbaycanda ictimai-siyasi sabitliyin, ərazi bütövlüyünün və suverenliyin bərpasının xarici investorlar üçün ölkənin cəlbediciliyinə təsir etdiyini də vurğulayıb.
Regionların dotasiyadan asılılığının azaldılması hədəfi
Deputat çıxışında regionların dövlət büdcəsindən dotasiyadan asılılığının azaldılması məsələsinə də toxunub.
O, Sahil Babayevin çıxışında həm neftdən asılılığın, həm də regionların dotasiyadan asılılığının azaldılmasının mühüm məqsədlər kimi qeyd edildiyini xatırladıb. Bildirib ki, bu istiqamətdə müəyyənləşdirilən hədəflər 2027-ci ilin dövlət büdcəsində də öz əksini tapıb.
Məhkəmə-hüquq islahatlarına ayrılan vəsait artırılır
Əli Hüseynlinin sözlərinə görə, 2027-ci ildə məhkəmə hakimiyyəti, hüquq-mühafizə və ədliyyə orqanlarının saxlanılması üçün ayrılan vəsait 2026-cı illə müqayisədə 3%, 2025-ci illə müqayisədə isə 17% çox olacaq.
Deputat bildirib ki, məhkəmə-hüquq islahatları üçün ayrılan maliyyə vəsaiti ilk növbədə qanunun aliliyinin təmin edilməsinə və insan hüquqlarının qorunmasına xidmət edir.
O, Milli Məclisdə birinci oxunuşda qəbul edilmiş “Pulsuz hüquqi yardım haqqında” qanunu da xüsusi qeyd edib. Deputatın fikrincə, bu qanunun tətbiqi vətəndaşların hüquqlarının daha səmərəli müdafiəsinə imkan yaradacaq.
Ə.Hüseynli 2027-ci ilin dövlət büdcəsində pulsuz hüquqi yardım xidmətinin həyata keçirilməsi üçün vəsait nəzərdə tutulmasını da diqqətə çatdırıb.
Korrupsiyaya qarşı mübarizə və büdcə şəffaflığı
Deputat Azərbaycanda korrupsiyaya qarşı mübarizənin prioritet istiqamətlərdən biri olaraq qaldığını bildirib.
Onun sözlərinə görə, cinayət və inzibati qanunvericiliyə edilmiş son dəyişikliklər maliyyə şəffaflığının və maliyyə nəzarətinin gücləndirilməsinə yönəlib.
Ə.Hüseynli büdcə şəffaflığının təmin edilməsi üçün preventiv tədbirlərin əhəmiyyətini vurğulayaraq, Milli Məclisdə müzakirə olunan korrupsiya ilə əlaqədar hüquqpozmalar barədə məlumat verən şəxslərin həvəsləndirilməsi və müdafiəsi, eləcə də maraqlar toqquşması haqqında qanun layihələrinə diqqət çəkib.
Deputat qeyd edib ki, həmin qanun layihələrinin 2026-cı ildə qəbul edilməsi 2027-ci ildə büdcə şəffaflığının təmin olunmasına xidmət edə bilər.



