PostNews – Hindistan 2025-ci ilin oktyabr–dekabr aylarında pambıq idxalını illik müqayisədə 2,6 dəfə və ya 158% artıraraq rekord səviyyəyə – 3,1 milyon tayaya çatdırıb.
Qeyd edək ki, hər bir pambıq tayasının çəkisi 170 kiloqram təşkil edir.
Məlumata görə, idxaldakı bu kəskin artım Hindistan hökumətinin 2025-ci ilin dekabr ayında idxal edilən pambığı 11% gömrük rüsumundan azad etməsi ilə birbaşa əlaqəlidir. Sözügedən qərar ölkənin yerli tekstil sənayesində xammala artan tələbatın qarşılanmasına xidmət edir.
Ekspertlərin fikrincə, rüsumsuz pambıq idxalı Hindistanın xaricdən alışlarını daha da stimullaşdıracaq və bu proses qlobal pambıq qiymətlərinə dəstək verə bilər. Bildirilir ki, Hindistan dünyanın ən iri pambıq istehlakçılarından biri olduğundan, bu tendensiya beynəlxalq pambıq bazarları üçün mühüm əhəmiyyət daşıyır.
Bununla yanaşı, analitiklər vurğulayırlar ki, rüsumsuz idxal daxili istehsalın azalması fonunda əvvəlcə yüksəlmiş pambıq qiymətlərinə təzyiq göstərə bilər. Bu isə yerli fermerlərin gəlirlərinə mənfi təsir riski yarada bilər.
