Reklam
Reklam
Reklam

Cəfər Nəcəfov: 50 nəfərin gördüyü işi indi 7 əməkdaşla yerinə yetiririk

Süni intellekt agentlərinin biznes proseslərinə inteqrasiyası şirkətlərdə iş bölgüsünü və əmək məhsuldarlığını dəyişir. Rəqəmsal marketinq sahəsində fəaliyyət göstərən bir şirkətdə əvvəllər 50 əməkdaş arasında bölüşdürülən işlərin hazırda süni intellekt agentləri vasitəsilə cəmi 7 nəfərlik komanda ilə yerinə yetirildiyi açıqlanıb.

PostNews xəbər verir ki, bunu “Nextool.ai” şirkətinin həmtəsisçisi və baş icraçı direktoru (CEO) Cəfər Nəcəfov noyabrın 13-də Bakıda keçirilən “Süni İntellekt Zirvəsi 2026” (AI Summit 2026) tədbirində bildirib.

Onun sözlərinə görə, şirkətin əvvəllər fəaliyyət göstərən Reel marketinq agentliyində kopirayterlər, rəqəmsal marketinq mütəxəssisləri, sosial şəbəkələrdə reklam yerləşdirən əməkdaşlar və digər işçilər çalışıblar. İki il əvvəl 50 nəfərə yaxın əməkdaşı olan kollektivdə müxtəlif tapşırıqlar ayrı-ayrı şəxslər arasında bölüşdürülüb.

Hazırda isə həmin əməliyyatların böyük hissəsi süni intellekt agentləri vasitəsilə həyata keçirilir və işlərin idarə olunması üçün maksimum 7 əməkdaş kifayət edir.

C.Nəcəfov bildirib ki, süni intellekt xüsusilə mətnlərin hazırlanması, vizual materialların yaradılması və rəqəmsal marketinq əməliyyatlarında insan əməyinə olan ehtiyacı dəyişdirir.

O qeyd edib ki, bu proses əmək bazarında yeni tələblər formalaşdırsa da, süni intellekt agentlərindən düzgün istifadə etməyi bacaran mütəxəssislərə ehtiyac artacaq. Şirkət rəhbərinin fikrincə, əsas üstünlük texnologiyadan istifadə etməklə daha çox işi daha qısa müddətdə yerinə yetirə bilən əməkdaşlarda olacaq.

C.Nəcəfov hazırda süni intellekt üzrə təlimlər keçdiyini və bu sahədə biliklərin yayılmasına çalışdığını da bildirib. Onun sözlərinə görə, gündəlik biznes əməliyyatlarının bir hissəsini hətta bir neçə kompüterdə işləyən süni intellekt tətbiqləri vasitəsilə avtomatlaşdırmaq mümkündür.

Şirkətlərdə əmək məhsuldarlığı necə dəyişəcək?

C.Nəcəfovun fikrincə, süni intellekt agentlərindən istifadə şirkətlərə əməkdaşların məhsuldarlığını artırmaq imkanı verir. O hesab edir ki, müəssisələr iş proseslərinin bir hissəsini avtomatlaşdıraraq əməkdaşların vaxtını daha səmərəli bölüşdürə bilərlər.

Şirkət rəhbəri bildirib ki, süni intellekt agentləri tapşırıqları icra etdiyi müddətdə insanın əsas vəzifələrindən biri nəticələri yoxlamaq, prosesə nəzarət etmək və texnologiyanın düzgün işləməsini təmin etmək olacaq.

Bununla yanaşı, o, süni intellektin növbəti inkişaf mərhələləri barədə də danışıb. C.Nəcəfov ümumi süni intellektin (AGI – Artificial General Intelligence) yaranmasının insan zəkası ilə süni intellekt arasındakı fərqi əhəmiyyətli dərəcədə azalda biləcəyini bildirib.

Onun sözlərinə görə, bu mərhələdən sonra super süni intellektin meydana çıxması ehtimalı da müzakirə olunur. C.Nəcəfov super süni intellektin insan zəkasını xeyli üstələyə biləcəyini və bunun müəyyən təhlükəsizlik məsələləri yaradacağını qeyd edib.

Gələcəyin əmək bazarında hansı biliklər tələb olunacaq?

C.Nəcəfov texnoloji dəyişikliklərə yalnız risk prizmasından yanaşmamağın vacibliyini də vurğulayıb. Onun fikrincə, süni intellekt və proqramlaşdırma sahəsində biliklərə yiyələnən insanlar dəyişən əmək bazarına daha çevik uyğunlaşmalıdırlar.

Şirkət rəhbəri bildirib ki, artıq yalnız proqramlaşdırma biliklərinə sahib olmaq kifayət etmir. Müxtəlif sahələri anlamaq, fərqli istiqamətlər üzrə bacarıqlar qazanmaq və həmin bilikləri süni intellekt agentlərinin imkanları ilə birləşdirmək vacibdir.

Onun sözlərinə görə, gələcəkdə əmək bazarında üstünlük davamlı öyrənən, texnoloji yeniliklərə uyğunlaşan və süni intellekt vasitələrindən praktiki məqsədlərlə istifadə etməyi bacaran mütəxəssislərə veriləcək.

Paylaş: