“Zəfərdən doğan işıq” adlı tədbir keçirilib
İşğaldan azad edilmiş ərazilərdə son altı ildə “AzərEnerji” ASC tərəfindən 50-dən artıq enerji obyekti istifadəyə verilib. Bu obyektlər arasında 40-a yaxın su elektrik stansiyası, 330 və 110 kV-luq 15-ə yaxın yarımstansiya, eləcə də 1000 kilometrdən artıq elektrik ötürmə xətti var.
PostNews xəbər verir ki, bu barədə “Zəfərdən doğan işıq” adlı tədbirdə “AzərEnerji” ASC-nin sədri Baba Rzayev məlumat verib.
Böyük Zəfərin 6-cı ildönümü münasibətilə “AzərEnerji” ASC-nin Baş İdarəetmə Kompleksində yerləşən 500 nəfərlik Energetiklərin Mədəniyyət Mərkəzində ölkə energetiklərinin iştirakı ilə tədbir keçirilib. Tədbirdə “AzərEnerji” və “Azərişıq” ASC-lərin, eləcə də bir sıra universitetlərin rəhbərləri iştirak ediblər.
Tədbirdə “Zəfər işığında” sərgisi və sənədli film nümayiş olunub
İştirakçılar əvvəlcə foyedə təşkil edilən “Zəfər işığında” adlı maket və fotoşəkil sərgisi ilə tanış olublar.
Rəsmi hissə Azərbaycan Respublikasının Dövlət Himninin səsləndirilməsi və Vətən uğrunda canından keçmiş şəhidlərin xatirəsinin bir dəqiqəlik sükutla yad edilməsi ilə başlayıb.
Daha sonra Prezident İlham Əliyevin tapşırıqlarına uyğun olaraq işğaldan azad edilmiş ərazilərdə həyata keçirilən enerji quruculuğunu, həmin torpaqların ölkənin vahid enerji sisteminə inteqrasiyasını və yaşıl enerji zonasına çevrilməsi istiqamətində görülən işləri əks etdirən “Zəfərdən doğan işıq” adlı sənədli film nümayiş etdirilib.
183 “AzərEnerji” əməkdaşı Vətən müharibəsində iştirak edib
Tədbirdə çıxış edən Baba Rzayev Prezident İlham Əliyevin rəhbərliyi ilə qazanılmış tarixi Zəfərin Azərbaycan xalqının taleyindəki müstəsna əhəmiyyətindən danışıb. O, 44 günlük Vətən müharibəsini və əldə edilən Qələbəni ölkə tarixinin ən şanlı səhifələrindən biri kimi xarakterizə edib.
“AzərEnerji” sədri müharibə dövründə energetiklərin həm ön, həm də arxa cəbhədə fədakarlıq göstərdiklərini vurğulayıb. Onun sözlərinə görə, səhmdar cəmiyyətin 183 əməkdaşı Vətən müharibəsində iştirak edərək qəhrəmanlıq və şücaət göstərib. Onlardan 2-si şəhid olub, 12 əməkdaşın ailə üzvü isə Vətən uğrunda canından keçib.
Baba Rzayev bildirib ki, müharibənin ən gərgin günlərində energetiklər gecə-gündüz çalışaraq ölkənin enerji təchizatının fasiləsizliyini təmin edib, enerji sistemində hər hansı çatışmazlığa yol verməyiblər.
Qarabağ və Şərqi Zəngəzurda 50-dən artıq enerji obyekti istifadəyə verilib
İşğaldan azad edilmiş ərazilərdə son altı ildə həyata keçirilən enerji quruculuğundan danışan Baba Rzayev qeyd edib ki, “AzərEnerji” tərəfindən həmin ərazilərdə 50-dən artıq enerji obyekti istifadəyə verilib.
Bu obyektlərə aşağıdakılar daxildir:
- 40-a yaxın su elektrik stansiyası;
- 330 və 110 kV-luq 15-ə yaxın yarımstansiya;
- 1000 kilometrdən artıq elektrik ötürmə xətti.
Hazırda 8 ərazidə su elektrik stansiyasının, 3 ərazidə isə 110 kV-luq yarımstansiyanın tikintisi davam etdirilir və yekunlaşmaq üzrədir.
Baba Rzayevin sözlərinə görə, yaradılan müasir enerji infrastrukturu Qarabağ və Şərqi Zəngəzurda bərpa-quruculuq işlərinin, yaşayışın və iqtisadi fəaliyyətin inkişafına imkan yaradır.
Su elektrik stansiyalarında 2 milyard kilovat-saata yaxın yaşıl enerji istehsal edilib
Çıxışda azad edilmiş ərazilərdə fəaliyyət göstərən su elektrik stansiyalarında istehsal olunan elektrik enerjisinin göstəriciləri də açıqlanıb.
Bildirilib ki, indiyədək həmin stansiyalarda 2 milyard kilovat-saata yaxın ekoloji cəhətdən təmiz elektrik enerjisi istehsal edilib. Bunun nəticəsində 400 milyon kubmetr təbii qaza qənaət olunub, 725 min ton karbon qazının atmosferə atılmasının qarşısı alınıb.
Tədbirdə çıxış edən digər natiqlər də Böyük Zəfərin tarixi əhəmiyyətindən, işğaldan azad edilmiş ərazilərdə aparılan genişmiqyaslı bərpa və quruculuq işlərindən danışıblar. Qeyd olunub ki, bu proses Azərbaycanın iqtisadi və texnoloji imkanlarını, dövlətin potensialını, xalqın birliyini və həmrəyliyini nümayiş etdirir.
Tədbirin sonunda 44 günlük Vətən müharibəsində qəhrəmanlıq göstərmiş “AzərEnerji” əməkdaşlarına hədiyyələr təqdim olunub. Zəfər ruhunu əks etdirən bayram konserti ilə tədbir başa çatıb.



