“Fitch Ratings” Azərbaycanda “Basel III” standartlarının tətbiqi bank kreditləşməsinə və sektor üzrə kredit portfelinin strukturuna əhəmiyyətli təsir göstərməyəcəyini proqnozlaşdırır.
PostNews xəbər verir ki, bu açıqlama “Fitch”in EMEA regionu bank reytinqləri üzrə direktor müavini Maksim Maliutin tərəfindən çərşənbə axşamı keçirilən vebinar zamanı verilib.
Maliutin bildirib ki, banklar pərakəndə seqmentdə kreditləşmənin artımını davam etdirəcək, korporativ portfel isə əsasən ticarət və xidmət sektorunda cəmləşəcək. O qeyd edib ki, yerli banklar neft-qaz şirkətlərini aktiv kreditləşdirmir və buna görə struktur dəyişikliklərinə əhəmiyyətli təsir gözlənilmir.
“Bir çox banklar artıq “Basel III”ün yeni tələblərini yerinə yetirmək üçün hazır vəziyyətdədir, çünki onların kapitalı kifayət qədər dayanıqlıdır. Kiçik banklar arasında ayrı-ayrı hallar mümkündür, lakin sektorun iri oyunçuları demək olar ki, tam hazırdır”, – Maliutin əlavə edib.
Azərbaycan Respublikası Mərkəzi Bankının İdarə Heyəti 16 dekabr 2025-ci il tarixli qərarı ilə “Bank kapitalının və onun adekvatlığının hesablanması Qaydaları”nda dəyişikliklər edib. Yeni qaydalar kapitalın strukturu, kapital adekvatlığı əmsalları, kapital buferləri və digər tələbləri “Basel III” standartlarına uyğunlaşdırır.
Dəyişikliklər bankların mümkün itkilərə qarşı dayanıqlığını artırmaq, risklərin düzgün qiymətləndirilməsini təmin etmək və iqtisadiyyatın dayanıqlı maliyyələşdirilməsini dəstəkləmək məqsədini daşıyır.
Qeyd edək ki, “Basel III” Bank Nəzarəti üzrə Bazel Komitəsinin tənzimləmə standartlarını əhatə edən sənəddir və 2010–2011-ci illərdə təsdiq olunub. Bu standartlar kapital tələblərini sərtləşdirir, likvidlik normativlərini tətbiq edir və bankçılıqda risklərin idarə edilməsinin keyfiyyətini artırmaqla maliyyə sisteminin sabitliyinə töhfə verir.
