“SpaceX” şirkətinin “Starship” kosmik gəmisi noyabrın 14-də həyata keçirilən sınaq uçuşundan sonra yaxşı vəziyyətdədir. Şirkətin təsisçisi İlon Mask gəminin təmir işlərindən sonra bir neçə həftə ərzində növbəti uçuşa hazır olacağını açıqlayıb.
PostNews xəbər verir ki, İlon Mask bu barədə “X” sosial şəbəkəsindəki hesabında paylaşım edib.
“Bu gün “Starship”in bütün istilik qoruyucu örtüyünü yoxladım və ümumilikdə əla vəziyyətdə olduğunu gördüm. Mühərriklər də yaxşı vəziyyətdədir. Gəmi təmir işlərindən sonra bir neçə həftə ərzində yenidən uçuşa hazır olacaq”, – deyə o bildirib.
“Starship”in uçuşlar arasında fasilələri azaldılacaq
İlon Mask bununla yanaşı, “Starship”in uçuşlar arasında uzun fasilələr olmadan, təyyarə kimi fəaliyyət göstərə bilməsi üçün bir sıra texniki təkmilləşdirmələrin vacibliyini vurğulayıb.
“SpaceX” gələcəkdə bu kosmik gəmidən “Starlink” peyklərinin daha tez-tez orbitə çıxarılması, eləcə də NASA-nın Aya missiyalarının həyata keçirilməsi üçün istifadə etməyi planlaşdırır.
“SpaceX” ildə minlərlə uçuş hədəfləyir
Qeyd edək ki, İlon Mask daha əvvəl “SpaceX” şirkətinin ildə yüzlərlə, hətta minlərlə “Starship” uçuşu həyata keçirməyi hədəflədiyini bildirib.
Bu hədəfin reallaşması kosmik nəqliyyatın intensivliyində ciddi artım demək olacaq və kosmik sənayedə indiyədək müşahidə olunmamış miqyas yarada bilər.



