Bakıda beynəlxalq kimya sənayesi sərgisi keçiriləcək – TÜİB strateji tərəfdaşdır

2027-ci il aprelin 6–8-də Bakı Ekspo Mərkəzində “Turkchem Azerbaijan 2027” beynəlxalq kimya sənayesi sərgisi keçiriləcək. Türkiyə–Azərbaycan İş Adamları və Sənayeçiləri İctimai Birliyi (TÜİB) tədbirin strateji tərəfdaşı qismində çıxış edəcək.

PostNews xəbər verir ki, sərgi Türkiyənin beynəlxalq sərgi təşkilatçılığı sahəsində fəaliyyət göstərən “Artkim Fuarcılık A.Ş.” şirkətinin koordinasiyası, Azərbaycanda fəaliyyət göstərən TÜİB üzvü “Echo Global” MMC-nin təşkilatçılığı və TÜİB-in strateji tərəfdaşlığı ilə təşkil olunacaq.

“Turkchem Azerbaijan 2027” sərgisində hansı sahələr təmsil olunacaq?

Beynəlxalq sərgi kimya və neft-kimya sənayesinin geniş istiqamətlərini əhatə edəcək.

Tədbir çərçivəsində əsas və xüsusi kimyəvi maddələr, neft-kimya məhsulları, laboratoriya və istehsal texnologiyaları, proses avadanlıqları, ölçmə, sınaq və analiz sistemləri, qablaşdırma texnologiyaları və digər əlaqəli sahələr üzrə məhsul və həllər təqdim olunacaq.

Sərgidə kimya və petrokimya sektorlarında fəaliyyət göstərən şirkətlərin məhsullarının, texnoloji yeniliklərinin və istehsal həllərinin nümayişi, həmçinin yeni əməkdaşlıq imkanlarının müzakirəsi nəzərdə tutulur.

Türkiyə şirkətlərinin Azərbaycan və region bazarlarına çıxışı genişləndiriləcək

“Turkchem Azerbaijan 2027” sərgisinin əsas məqsədlərindən biri Türkiyə şirkətlərinin beynəlxalq bazarlara çıxış imkanlarının artırılmasıdır.

Bu istiqamətdə Azərbaycan prioritet bazar kimi müəyyənləşdirilir. Bununla yanaşı, Qafqaz, Mərkəzi Asiya və Xəzər regionu ölkələri ilə ticarət və texnoloji əməkdaşlığın genişləndirilməsi hədəflənir.

Sərginin Türkiyə şirkətlərinin regional ixrac potensialının artırılmasına, yeni tərəfdaşlıqların qurulmasına və sənaye sahəsində işgüzar əlaqələrin inkişafına töhfə verməsi gözlənilir.

Azərbaycan və Türkiyə arasında sənaye əməkdaşlığı üçün yeni platforma

Təşkilatçıların hədəflərinə əsasən, “Turkchem Azerbaijan 2027” yalnız məhsul və texnologiyaların nümayiş olunduğu sərgi kimi deyil, davamlı regional əməkdaşlıq platforması kimi inkişaf etdiriləcək.

Bu yanaşma Azərbaycan və Türkiyə arasında mövcud sənaye və ticarət əlaqələrinin üçüncü ölkələrin bazarlarına genişləndirilməsini nəzərdə tutur.

Sərgi yerli və beynəlxalq şirkətlərə potensial biznes tərəfdaşlarını müəyyənləşdirmək, məhsul və xidmətlərini təqdim etmək, yeni bazar imkanlarını araşdırmaq və regional işgüzar əlaqələrini genişləndirmək üçün imkanlar yaradacaq.

TÜİB sahibkarları beynəlxalq sərgidə iştiraka dəvət edir

Türkiyə–Azərbaycan İş Adamları və Sənayeçiləri İctimai Birliyi yerli sahibkarları, sənaye müəssisələrini və biznes nümayəndələrini “Turkchem Azerbaijan 2027” beynəlxalq sərgisində iştiraka dəvət edir.

Tədbirdə iştirak şirkətlərə beynəlxalq bazarlarda mövqelərini gücləndirmək, yeni ticarət və texnoloji tərəfdaşlıqlar qurmaq, eləcə də Azərbaycanla digər region ölkələri arasında sənaye əməkdaşlığının inkişafında iştirak etmək imkanı verəcək.

“Turkchem Azerbaijan 2027” – tarix, məkan və iştirak məlumatları

Sərgi haqqında ətraflı məlumat: https://turkchem.az/en/home

İştirakla bağlı əlaqə:

Əlaqələndirici şəxs: Narmina Spatar

Telefon: (+994 10) 239 66 88

E-poçt: narmina.spatar@echoglobal.az