Azərbaycanda dövlət qulluqçuları üçün pulsuz rəqəmsal təlim proqramına start verilib

Azərbaycanda dövlət qulluqçuları və dövlət qurumlarının əməkdaşları üçün “Rəqəmsal Üfüqlər” Milli Rəqəmsal Savadlılıq Təlim Proqramına start verilib. Proqram çərçivəsində süni intellekt, kibertəhlükəsizlik, məlumat analitikası, bulud texnologiyaları və rəqəmsal dövlət xidmətləri üzrə ödənişsiz onlayn təlimlər keçiriləcək.

PostNews xəbər verir ki, proqram Rəqəmsal İnkişaf və Nəqliyyat Nazirliyinin tabeliyində fəaliyyət göstərən İnnovasiya və Rəqəmsal İnkişaf Agentliyi (İRİA) tərəfindən həyata keçirilir.

Təşəbbüsün əsas məqsədi dövlət sektorunda rəqəmsal bacarıqları beynəlxalq standartlar əsasında inkişaf etdirmək, dövlət idarəçiliyində rəqəmsal transformasiyanı sürətləndirmək və müasir texnologiyalardan istifadə üzrə insan kapitalını gücləndirməkdir.

Pulsuz rəqəmsal təlimlər kimlər üçün nəzərdə tutulub?

“Rəqəmsal Üfüqlər” proqramı dövlət qulluqçularını və dövlət qurumlarının bütün əməkdaşlarını əhatə edir.

Təlimlərdə rəhbər vəzifələrdə çalışan şəxslər və müxtəlif sahələr üzrə mütəxəssislər iştirak edə biləcəklər.

Proqram yalnız Bakı şəhərində deyil, Azərbaycanın regionlarında fəaliyyət göstərən dövlət qurumlarının əməkdaşları üçün də nəzərdə tutulub.

Təlimlər rəqəmsal platforma üzərindən onlayn formatda və tam ödənişsiz keçiriləcək.

Süni intellekt və kibertəhlükəsizlik üzrə hansı biliklər öyrədiləcək?

Proqramın tədris məzmunu Avropa Rəqəmsal Səriştələr Çərçivəsi – EU DigComp 3.0 əsasında hazırlanıb.

Kurikulum beynəlxalq standartlara uyğun tərtib edilərək Azərbaycan dilinə uyğunlaşdırılıb. Rəqəmsal təlim platforması və qiymətləndirmə sistemi istifadəyə hazır vəziyyətə gətirilib.

Proqram iki tədris səviyyəsini əhatə edir.

Təməl səviyyə (Foundational) çərçivəsində iştirakçılara rəqəmsal alətlərdən təhlükəsiz və səmərəli istifadə, məlumat savadlılığı, rəqəmsal ünsiyyət və kibertəhlükəsizliyin əsas prinsipləri öyrədiləcək.

Orta səviyyə (Intermediate) üzrə isə məlumat analitikası, bulud texnologiyaları, süni intellektdən məsuliyyətli və etik istifadə, qabaqcıl kibertəhlükəsizlik yanaşmaları və rəqəmsal dövlət xidmətləri üzrə bilik və bacarıqlar inkişaf etdiriləcək.

İştirakçılar fərdi bilik səviyyəsinə uyğun təlim keçəcəklər

“Rəqəmsal Üfüqlər” proqramında adaptiv öyrənmə modelindən istifadə olunacaq.

Bu modelə əsasən, hər bir iştirakçı əvvəlcə ilkin qiymətləndirmədən keçəcək. Qiymətləndirmənin nəticələrinə uyğun olaraq iştirakçı müvafiq tədris səviyyəsinə yönləndiriləcək.

Beləliklə, təlim prosesi iştirakçıların mövcud rəqəmsal bilik və bacarıqları nəzərə alınmaqla təşkil ediləcək.

Hər bir iştirakçıya proqramı tamamlamaq üçün bir ay müddət veriləcək.

Təlimi bitirənlərə qızıl, gümüş və bürünc sertifikatlar veriləcək

Proqramın yekununda iştirakçıların nəticələri qiymətləndiriləcək və topladıqları ballara uyğun sertifikatlar təqdim olunacaq.

Sertifikatlaşdırma qaydaları aşağıdakı kimidir:

60%-dən aşağı nəticə göstərən iştirakçılar təlimi yenidən keçərək qiymətləndirmədə təkrar iştirak edə biləcəklər.

Təlim prosesinə rəqəmsal monitorinq tətbiq olunacaq

Proqramın icrası zamanı müasir rəqəmsal idarəetmə və monitorinq mexanizmlərindən istifadə nəzərdə tutulur.

Bu mexanizmlər vasitəsilə təlim prosesinin şəffaflığının, səmərəliliyinin və nəticəyönümlü idarə olunmasının təmin edilməsi hədəflənir.

Proqram 2026–2028-ci illərin rəqəmsal inkişaf planına əsaslanır

“Rəqəmsal Üfüqlər” Milli Rəqəmsal Savadlılıq Təlim Proqramı Azərbaycanda rəqəmsal inkişaf sahəsində qəbul edilmiş strateji sənədlərin icrası çərçivəsində həyata keçirilir.

Proqram Azərbaycan Respublikasında rəqəmsal inkişafın sürətləndirilməsi üzrə 2026–2028-ci illər üçün Fəaliyyət Planının 8.1.12-ci yarımbəndinə, həmçinin Azərbaycan Respublikasında Rəqəmsal İnkişaf Konsepsiyasının (2025–2027) 2.4-cü bəndinə uyğun təşkil olunur.

Təşəbbüs dövlət qurumlarında çalışan şəxslərin rəqəmsal səriştələrinin artırılmasına, süni intellekt və digər müasir texnologiyaların tətbiqi üzrə biliklərin genişləndirilməsinə xidmət edir.